Украина президенти Владимир Зеленский 5 июнь куни Қатар амири билан музокара олиб бориш учун Доҳага борган. Бу ҳақда Аl Arabia нашри хабар берди.
Зеленскийнинг ўзи ҳам Қатарга сафарини ижтимоий тармоқда тасдиқлаган. Сафардан мақсад Россияда қолаётган украин болаларини қайтаришда Қатарни воситачилик қилишга кўндириш бўлган.
Манбада айтилишича, 2023 йил июль ойидан бери Қатар ҳукумати Россия ва Шарқий Украинанинг босиб олинган ҳудудларга олиб кетилган ўнлаб болаларни Киевга қайтаришга ёрдам берган. Украина учун бу жуда муҳим масала бўлиб, президент Зеленский Қатар расмийларидан ушбу борадаги саъй-ҳаракатларни давом эттиришни сўраган.
“Қатар Украинага Россия томонидан ўғирлаб кетилган болаларни қайтаришда ёрдам бермоқда. Биз бу саъй-ҳаракатларни яна муҳокама қиламиз”, — деган Зеленский Қатар амири Шайх Тамим ибн Ҳамад ал-Соний билан музокараларини ҳақида баёнот берар экан.
Зеленскийнинг айтишича, Қатар Швейцарияда бўлиб ўтадиган Украина тинчлик саммитини ташкил этишда фаол рол ўйнаган. Киев расмийлари бу саммитда Қатарнинг украиналик болалар ўғирлаб кетилиши билан боғлиқ масаласи кўтариб чиқишига умид қилмоқда.
Владимир Зеленский Қатарга сафари чоғида иқтисодий ва хавфсизлик масалаларини ҳам муҳокама қилишини айтган.
Изоҳ (0)