“Путинга қийин бўлади”. Британия халқаро судга Россия президентига қарши ишда ёрдам беришни ваъда қилди

Буюк Британия адлия вазири Доминик Рааб Гаагадаги Халқаро жиноий суднинг Россия етакчиси Владимир Путинни ҳибсга олиш ҳақида ордер бериш қарорини қўллаб-қувватлади, деб ёзмоқда BBC.

Вазир Лондон ХЖСга суд-тиббий экспертиза ўтказиш ва Россия президентига қўйилган айбловларни текширишда ёрдам беришини ваъда қилди.

“Бу узоқ давом этадиган жараён бўлади, лекин Югославия ҳақида ҳам, Руанда ҳақида ҳам шундай дейилганди ва якунда қон тўкилишига жавобгар бўлган кўплаб одамлар судга тортилди”, — деди Доминик Рааб.

Британия вазири, шунингдек, яқин орада Путинга “қийин” бўлишини таъкидлади, чунки Гаага судининг ҳибсга олиш ордери унинг ХЖСга аъзо давлатларга сафарларини автоматик равишда блоклайди.

Ўз навбатида, Рааб ҳамкорларни Путинга қарши жараённи қўллаб-қувватлашга чақирди ва бу ишни текшириш бўйича барча тадбирлар тўлиқ техник кўмак, хусусан, суд экспертизаси, гувоҳларни сўроқ қилиш кабилар билан амалга оширилиши муҳимлигини таъкидлади.

“Биз бу ерда, Лондонда нидерландиялик ҳамкасбларимиз ва бутун дунё бўйлаб ҳамкорларимиз билан буларни қилмоқдамиз”, — деди Британия адлия вазири.

Путинни ҳибсга олиш учун ордер

Гаагадаги Халқаро жиноий суд17 март куни Россия президенти Владимир Путинни ҳибсга олишга ордер берди. Россия президенти Украинанинг босиб олинган ҳудудларидан болаларни Россияга ноқонуний равишда депортация қилганликда гумонланмоқда. Шунингдек, суд Россиянинг болалар ҳуқуқлари бўйича комиссари Мария Лвова-Беловани ҳам ҳибсга олиш учун ордер берган.

Украина раҳбари Владимир Зеленский суд қарорини “тарихий” деб атади. Унинг қайд этишича, украиналик болаларни оммавий депортация қилиш Путиннинг иштирокисиз амалга оширилмаган бўларди.

АҚШ президенти Жо Байден XСЖнинг Путинни ҳибсга олишга ордер бериш ҳақидаги қарори асосли деб атади.

Путиннинг матбуот котиби Дмитрий Песков ордер бериш ҳақидаги “муаммонинг кўтарилиши”ни “номақбул” деб атади ва Россия суд юрисдикциясини тан олмаслигини, бу эса суд қарорлари ҳақиқий эмаслигини билдиришини таъкидлади. Львова-Белованинг айтишича, халқаро ҳамжамият унинг болаларни уруш зонасидан олиб чиқишдаги фаолиятини шу тариқа “юқори” баҳолаган. У “ўз ишида давом этишини” қўшимча қилди.