АҚШ Рамзан Қодировнинг онасига санкция қўллади

АҚШ Молия вазирлигининг чет эл активларини назорат қилиш бошқармаси (OFAC) Чеченистон раҳбари Рамзан Қодировнинг онасига санкция қўллади.

Байден бу санкциялар украиналик болаларнинг Россияга ноқонуний депортация қилингани учун қўлланилаётганини таъкидлаган. Шунингдек, санкциялар рўйхатидан қуйидагилар жой олган:

• Чеченистон раҳбарининг онаси — Аймани Қодирова;
• Чеченистон ҳукумати раҳбари — Муслим Хучиев;
• Чеченистондаги Инсон ҳуқуқлари бўйича комиссар — Мансур Солтаев;
• Ички ишлар вазирлигининг Ахмат Қодиров номидаги Чеченистон бўйича махсус полки командири — Замид Чалаев;
• Калуга вилояти болалар ҳуқуқлари бўйича комиссари — Ирина Агеева;
• Ростов вилоятидаги болалар омбудсмани — Ирина Черкасова;
• Белгород вилоятидаги болалар омбудсмани — Галина Пятих;
• Аннексия қилинган Севастополдаги “Юнармия” раҳбари — Владимир Коваленко;
• Севастопол университети ректори — Владимир Нечаев;
• Украинанинг Запорожье вилоятининг қўшиб олинган қисмидаги “таълим вазири” — Елена Шапурова.

Аймани Қодирова Украинанинг Россия томонидан босиб олинган ҳудудлари аҳолиси ва жангариларга гуманитар ёрдам жўнатиб турувчи жамғармани бошқаради.

Гаагадаги Халқаро жиноят суди март ойида Россия президенти Владимир Путинни ҳибсга олишга ордер берганди. У Украинанинг босиб олинган ҳудудларидан болаларни Россияга ноқонуний депортация қилишда гумон қилинмоқда. Худди шундай ордер болалар ҳуқуқлари бўйича омбудсман Мария Лвова-Беловага нисбатан ҳам чиқарилган.