Украина хорижий давлатларни Иккинчи жаҳон уруши қурбонларини муносиб хотирлашга ҳамда Москвадаги парадда ҳарбийлари иштирокидан воз кечишга чақирди. Мамлакат Ташқи ишлар вазирлиги тегишли баёнот берди.
Бугун фашизм устидан ғалаба қозонган халқлардан бири бўлган, Европада тинчлик ва озодлик учун даҳшатли бадал тўлаган Украина халқига қарши шафқатсиз ва асоссиз босқинчилик уруши олиб борилмоқда. Ушбу тажовуз давомида рус аскарлари юз минглаб ҳарбий жиноятлар содир этди, 620 кишини ўлдирди ва деярли 2 минг кишини ярадор қилди, камида 20 минг украиналик болани депортация қилди, дейилади баёнотда.
Вазирлик Россия армияси Украинада Иккинчи жаҳон урушидан бери Европа кўрмаган даражадаги ваҳшийликларни амалга ошираётганини ва айнан шу армия 9 май куни Москванинг Қизил майдонида парадга чиқишини таъкидлади.
Бу одамлар Европанинг халоскорлари эмас, улар босқинчилар ва ҳарбий жиноятчилардир. Улар билан ёнма-ён юриш — бу натсизм устидан қозонилган ғалабани шарафлаш эмас, балки ўлдирилган украиналик болалар, тинч аҳоли ва ҳарбийлар қони учун жавобгарликни бўлишишдир. Россия ўз ҳарбий жиноятларини оқлаш ва тажовузини асослаш учун хорижий ҳарбий хизматчиларни 9 май парадида иштирок этишга таклиф қилмоқда, дейилади баёнотда.
Украина хорижий ҳарбийларнинг парадда иштирок этишини номақбул деб ҳисоблайди. Киев буни натсизм устидан қозонилган ғалаба хотирасига, 80 йил олдин мамлакатни ва бутун Европани натсизмдан озод қилган миллионлаб украиналик фронтчилар хотирасига нисбатан ҳақорат сифатида баҳолайди.
Барча хорижий давлатларни ўз ҳарбий хизматчиларини 9 май куни Москвада бўлиб ўтадиган парадда иштирок этишдан тийишга чақирамиз. Бу, айниқса, Россиянинг Украинага қарши тажовузига нисбатан бетарафлигини эълон қилган ёки халқаро муносабатларда доимий равишда нейтрал позицияни эгаллаб келган давлатларга тааллуқлидир. Бундай мамлакатлар ҳарбийларининг қўшма парадда иштироки эълон қилинган нейтралликни тўғридан-тўғри бузади ва тажовузкор давлатни қўллаб-қувватлаш бўлиб кўринади, дейилади хабарда.
Россия президенти ёрдамчиси Юрий Ушаковнинг маълум қилишича, парадда Озарбайжон, Вьетнам, Беларусь, Миср, Қозоғистон, Хитой, Қирғизистон, Лаос, Мўғулистон, Мьянма, Тожикистон, Туркманистон, Ўзбекистон каби 13 давлатдан ҳарбийлар иштирок этади.
Изоҳ (0)