Ўзбекистон жамоат ташкилотлари ва ишбилармонлар номидан украиналик болаларга инсонпарварлик ёрдами етказилди. Бу ҳақда Украинанинг Тошкентдаги элчиси Николай Дорошенко ўзининг Facebook даги саҳифасига ёзиб қолдирди.
Қайд этилишича, ушбу ёрдам пакетидан эркаклар, аёллар ва болалар учун футболкалар, шунингдек, 2000 та биринчи синф тўплами ўрин олган. Тўпламдан мактаб сумкаси, дафтар, расм дафтари, рангли қоғоз, пластилин тўплами, ручка, елим, қалам, рангли қалам, акварел ва қалам қутиси киритилган.
Гуманитар юкни Украина—Ўзбекистон дўстлиги халқаро жамияти раҳбари Любомир Башинский қабул қилиб олган.
Биринчи синф ўқувчилари учун тўпламлар Закарпат вилояти маъмуриятининг кўчирилганлар марказига топширилган. Улар Харьков, Херсон, Николаев ва Запорожье вилоятларидан етимлар ва кўчирилганларнинг болаларига топширилади.
Август ўрталарида нодавлат нотижорат ташкилотлари ва Ўзбекистон бизнес тузилмалари Украинага 10,5 тонна гуманитар ёрдам жўнатганди. Украинага жами 785 844 гривнага (тахминан 21 282 доллар) қишки пойабзал , спорт, болалар ва аёллар кийимлари юборилган эди. Охирида бўлса Украинанинг Ўзбекистондаги элчихонаси ўзбекистонликларни урушда жабр кўрган аёллар ва болаларга шошилинч ёрдам кўрсатишга чақирган.
Изоҳ (0)