Исроил мудофаа кучларининг Эронга ҳужумлари оқибатида камида 14 нафар ядрочи олим ҳалок бўлди. Бу ҳақда Форс кўрфази мамлакатларидаги икки манбага таяниб Reuters хабар берди.
Маълум қилинишича, олимларнинг баъзилари автомобилларга қўйилган бомбалар туфайли портлаган. Эроннинг Nour News агентлиги камида олти нафар ядрочи олим ҳалок бўлгани ҳақида хабар берган. Абдулҳамид Минучеҳр, Аҳмадризо Зулфиқорий, Амирҳусайн Фаххий, Матлабизода, Муҳаммад Меҳди Теҳрончи, Фаридун Аббосий шулар жумласидандир.
Уларнинг кўпчилиги 2020 йилда Исроил томонидан ўлдирилган “Эрон ядровий лойиҳасининг отаси” Муҳсин Фахризоданинг ворислари бўлган.
Исроил ва Эроннинг ўзаро ҳужумлари 13 июнга ўтар кечаси бошланди. Яҳудий давлати “Исёнкор шер” операциясини олиб бормоқда. Унинг доирасида Исроил қўшинлари Эрон ҳудудидаги ядровий ва ҳарбий объектларга ҳужум қилмоқда.
Эрон олий раҳнамоси Оятуллоҳ Али Хоманаий фуқароларга йўллаган мурожаатида Исроилнинг Эронга берган зарбаларини жиноят деб атаган. У Исроилни “аччиқ ва даҳшатли тақдир” кутаётганини таъкидлаган. Теҳрон “Ҳақиқий ваъда 3” номли операцияни бошлаган. Унинг доирасида Исроилга юзлаб ракеталар учирилган. Икки давлат бир-бирига ҳужум қилишда давом этмоқда.
Изоҳ (0)