Илон Маск 14 июнь куни Эронда Starlink сунъий йўлдош интернет хизмати фаоллашганини эълон қилди. Бу ҳақда Тhе Economic Times хабар берди.
Эрон ҳукумати Исроил билан кескинлик ортидан бутун мамлакат бўйлаб интернетга чекловлар киритган. 13 июнь куни Эрон Алоқа вазирлиги Исроилнинг ҳарбий ва ядровий объектларга ҳужумлар тўлқинига жавобан “мамлакат интернетига вақтинчалик чекловлар киритилганини” маълум қилган.
Вазирликка кўра, чекловлар нормал ҳолат тикланмагунча сақланиб қолади, бу эса миллионлаб одамларни рақамли алоқадан узиб қўяди. Starlink интернет хизмати узоқ жойларга ёки анъанавий алоқа инфратузилмаси ўчирилган жойларга уланишни таъминлаш учун Ер орбитаси сунъий йўлдошларидан фойдаланади.
Тахминларга кўра, Эронда қора бозор каналлари орқали 20 мингга яқин Starlink терминаллари ишламоқда. Ушбу хизмат ҳукумат томонидан жорий этилган блекаут пайтида мулоқот қилиш ва маълумот олишни истаган Эрон фуқаролари учун нажот йўли эканлиги айтилган.
Эрон ҳукуматининг интернетга киришни чеклаш тўғрисидаги қарори эҳтимолий фуқаролик тартибсизликларининг олдини олишга қаратилган бўлиб, аввалги норозилик ҳаракатлари пайтида қўлланган тактикага ўхшайди. Бироқ Starlink’нинг ишга туширилиши давом этаётган ҳарбий инқироз даврида ахборот оқимини назорат қилиш бўйича ушбу саъй-ҳаракатларни мураккаблаштириши мумкинлиги билдирилган.
Изоҳ (0)