Uzbekistan Airports Эрон ҳаво ҳудудининг ёпилиши муносабати билан бир нечта рейслар Тошкентдаги муқобил аэродромга йўналтирилганини эълон қилди.
Uzbekistan Airways авиакомпаниясининг Тошкент—Жидда йўналишидаги HY5343 рейси соат 6:18 да Тошкент аэропортига қайтиб қўнди. Fly Dubai авиакомпаниясининг Тошкент—Дубай йўналишидаги FЗ1942 рейси маҳаллий вақт билан соат 6:37 да қўнди.
Шунингдек, Аir Cаirо авиакомпаниясининг Олмаота—Шарм аш-Шайх йўналиши бўйича СМ882 рейси (07:46) ва Qatar Airways авиакомпаниясининг Сеул—Доҳа йўналиши бўйича QR8985 рейси (07:57) Тошкент аэропортига фавқулодда қўнишни амалга оширди.
Шунингдек, Centrum Air авиакомпаниясининг Тошкент—Доҳа йўналиши бўйича C63341 рейси учиш аэропортида кечиктирилди. Йўловчилар вақтинчалик терминалга жойлаштирилди.
Парвозлар ҳолати ҳақида батафсил маълумот олиш учун авиаташувчига мурожаат қилиш мумкин.
Исроил 13 июнга ўтар кечаси Эронга йирик кўламда ҳужум уюштириб, мамлакат ядровий дастурининг асосий объектлари ва юқори мартабали ҳарбий раҳбарларини нишонга олди. Мамлакат фавқулодда ҳолат эълон қилиб, ҳаво ҳудудини ёпди. Исроил Эрондан жавоб ҳужумини кутмоқда. Эрон Исроил ҳужумларига қатъий жавоб қайтаришни ваъда берди.
Ўзбекистоннинг Исроилдаги элчихонаси эҳтимолий ракета ҳужумлари сабаб билан ўзбекистонликларга тезкор эҳтиёт чораларини кўришни қатъий тавсия қилди. Ўзбекистоннинг Эрондаги элчихонаси ҳам фуқароларга хавфсизлик чораларига қатъий риоя қилишни, шунингдек, Эрон ҳукумати ва Ўзбекистон элчихонаси расмий хабарларини мунтазам равишда кузатиб боришни тавсия қилди.
Изоҳ (0)