Эронда фуқаро авиацияси парвозларига киритилган чекловлар бекор қилинди, деб хабар бермоқда “Интерфакс”.
“Фуқаролик авиацияси ташкилоти қулай ва хавфсиз парвоз шароитларини таъминлаганидан сўнг барча эълон қилинган чекловлар бекор қилинди ва авиакомпанияларга парвозларни амалга оширишга рухсат берилди”, дейилади хабарда.
Аввалроқ “Меҳр” агентлиги Эрон фуқаро авиацияси ташкилоти вакилига таяниб, Эроннинг барча аэропортлари 6 октябрь, якшанба куни соат 21:00 дан (маҳаллий вақт билан) душанба куни эрталаб соат 6:00 гача парвозларни бекор қилгани ҳақида хабар берганди.
Якшанба куни Ислом инқилоби қўриқчилари корпуси (IQRК) Ҳарбий-денгиз кучлари қўмондони контр-адмирал Алиризо Тангсири Эрон қўмондонлиги Теҳрон Исроил билан тўқнаш келган тақдирда бир қанча чора-тадбирлар режасини ишлаб чиққанини айтганди.
Ўз навбатида, Эрон қуролли кучларидаги манба Tasnim агентлигига Эрон ҳарбийлари Исроилнинг эҳтимолий ҳаракатларига тўлиқ тайёр эканини маълум қилган.
1 октябрь куни Ислом инқилоби қўриқчилари корпуси “Ҳақиқий ваъда 2” операцияси доирасида Исроилга кўп сонли баллистик ракеталар учирди. Исроил ҳарбийлари мазкур ҳужумга “вақти келганда” жавоб беришни маълум қилган.
Изоҳ (0)