Исроил ҳукумати маҳаллий корхоналарга Эронга қарши туриш учун тезроқ ва яширин учувчисиз учиш қурилмаларини ишлаб чиқиш вазифасини топширди. Бу ҳақда мудофаа соҳасидаги манбаларга таяниб, Breaking Defense хабар берди.
Маълум қилинишича, Исроил келажакда Эронга ҳужум қилиш имкониятини кўриб чиқмоқда, шунинг учун унга янги ҳужумчи дронлар керак. Ҳозирда мамлакатда ишлаб чиқаришнинг турли босқичларида бўлган камида учта дронни йиғиш ишлари олиб борилмоқда. Уларнинг айримлари принципиал жиҳатдан янги моделлар, бошқалари эса мавжудларининг такомиллаштирилган версиялари саналади.
Дрон ишлаб чиқувчилар учиш қурилмасининг хизмат қилиш муддатини ошириш ва уларнинг радарларда «кўринмас»лигини таъминлаш устида ишламоқда. Мисол учун, Hermes-450 дрони жуда шовқинли айланувчи двигатель билан жиҳозланган бўлиб, унинг товушлари Ғазо сектори ва Ғарбий Соҳил бўйлаб парвозлар пайтида катта муаммо туғдирмайди, бироқ узоқ масофали операцияларни бузиши мумкин. Бир неча йил олдин ИАФ ва Elbit овоз баландлигини камайтириш учун дронларга овоз пасайтиргичларни бириктирди, аммо бу етарли натижа бермади.
Бундан ташқари, Исроил Мудофаа вазирлиги узоқ масофали парвозлар вақтида турли вазифаларни бажариш имконини берувчи фойдали юкларнинг янги турларини ишлаб чиқишдан манфаатдор. Мамлакат жуда кучли жанговар каллакларга эга ва енгил дронларни ишлаб чиқишни кўриб чиқмоқда.
Исроил кўп йиллар давомида ўзи ишлаб чиқарган дронлари борлигини яшириб келган ва 2022 йилнинг ёзидагина ҳукумат ушбу мавзуни оммавий ахборот воситаларида ёритишга қўйилган тақиқини бекор қилган. Кўплаб манбаларга кўра, ҳукумат саноат компанияларининг ташқи бозорга чиқиш учун шундай қадам ташлаган.
Ҳозирги вақтда Исроилнинг энг машҳур жанговар учувчисиз учоқлари қаторига Elbit тизимлари томонидан ишлаб чиқарилган Hermes-450 ва Israel Aerospace Industries (ИАИ) компаниясининг Heron-TP дрони киради.
Hermes-450 максимал юк кўтариши 180 килограмм, парвоз давомийлиги 17 соат ва максимал баландлиги 5,5 километрдир. Heron-TP’нинг максимал юк кўтариши эса 2700 килограм, батареянинг ишлаш муддати 30 соат ва максимал баландлиги тахминан 14 километрни ташкил қилади.
Мутахассисларга кўра, бу «айсбергнинг учи», сабаби Исроил армиясининг арсеналида махсус қуроллар ва фойдали юклар билан жиҳозланган бошқа дронлар ҳам бор. Исроил мунтазам равишда бу дронлардан бутун Яқин Шарқда узоқ масофали аниқ зарбалар учун фойдаланади, аммо улар ҳақидаги маълумотлар қатъий сир сақланади. Охирги операциялардан бири 8 ноябрь, сешанба куни бўлиб ўтди. Учувчисиз учиш аппарати Эрондан Сурияга кетаётган юк машиналари карвонини уриб юборди, оқибатда 15 киши ҳалок бўлди.
13 ноябрь куни Исроил Сурияда Эрон ва Россия томонидан фойдаланиб келинган авиабазага ҳужум қилди. Ракета ҳужуми оқибатида икки нафар ҳарбий хизматчи ҳалок бўлди, уч нафари эса яраланди.
Изоҳ (0)