Исроил 13 июнга ўтар кечаси Эронга йирик кўламда ҳужум уюштириб, мамлакат ядровий дастурининг асосий объектлари ва юқори мартабали ҳарбий раҳбарларини нишонга олди. Бу ҳақда CNN хабар берди.
Исроил бош вазири Биньямин Нетаньяху Рисинг Лион операцияси Эроннинг Натанздаги асосий уран бойитиш заводига ва ядро олимларига зарба берганини маълум қилди.
Эрон давлат ОАВлари ҳужумларда ҳалок бўлганлар орасида Эрон Ислом инқилоби гвардияси бош қўмондони генерал Ҳусайн Саламий ҳам борлиги ҳақида хабар бермоқда. Теҳрондаги турар жой биноларида ёнғинлар бошланган. Инфратузилма объектларига ҳам зарар етган.
Исроил мудофаа вазири Исраэл Кац шундай баёнот берди: “Биз шундай муҳим нуқтадамизки, агар буни ўтказиб юборсак, Эроннинг мавжудлигимизга таҳдид соладиган ядро қуролини ишлаб чиқишига тўсқинлик қила олмаймиз”.
Давлат котиби Марко Рубио ҳарбий операцияда АҚШнинг иштироки ва ёрдами бўлмаганини таъкидлаб ўтган.
“Бугун тунда Исроил Эронга қарши бир томонлама чора кўрди. Биз бу ҳаракатда иштирок этмаяпмиз ва бизнинг устувор вазифамиз минтақадаги Америка кучларини ҳимоя қилишдир”, дейилади унинг баёнотида.
Исроил кейинги ҳаракатларга тайёргарлик кўриш мақсадида ўн минглаб аскарларни жалб қилаётгани таъкидланган. Мамлакат фавқулодда ҳолат эълон қилиб, ҳаво ҳудудини ёпди. Исроил Эрондан жавоб ҳужумини кутмоқда.
Изоҳ (0)