Эроннинг юқори мартабали ҳарбий амалдори Теҳрон Исроилнинг мамлакат ҳудудига берган авиазарбаларига қатъий жавоб қайтаришини маълум қилди. Бу ҳақда Tengrinews хабар берди.
“Душманлар қуролли кучлардан қатъий жавоб куцин. Қуролли кучларимиз бунга ҳар томонлама тайёр ва албатта қатъий жавоб беради. Қасос ҳал қилувчи бўлади ва сионистик режим ва Қўшма Штатлар бунинг ҳаққини тўлайди”, деди Эрон қуролли кучлари генерали Аболфазл Шекарчи.
Эрон олий раҳбари Оятуллоҳ Али Хоманаий Исроил бу зарбаси билан “ўзи учун аччиқ ва оғриқли тақдир тайёрлаганини” ва “қаттиқ жазо” кутиши кераклигини билдирган.
“Ислом республикаси қуролли кучларининг қудратли қўли уни тинч қўймайди. Душман ҳужумида бир неча саркарда ва олимлар ҳалок бўлди. Уларнинг ўринбосарлари ва сафдошлари, Аллоҳнинг иродаси билан, ўз вазифаларини кечиктирмасдан бажаради”, деди Оятуллоҳ Али Хоманаий.
13 июнга ўтар кечаси Исроил режими Эронга йирик ҳаво ҳужуми уюштирган. Унда кўплаб тинч аҳоли, аскарлар, ҳарбий раҳбарлар ва олимлар ҳалок бўлган. Исроил ҳарбийлари Эронга қарши “олдиндан огоҳлантирувчи” ҳарбий зарбалар бошланганини тасдиқлаб, зарбалар Теҳроннинг ядровий объектларига, ўнлаб нишонларга берилганини айтган.
Эрон ташқи ишлар вазири Исроил томонидан берилган зарбаларга жавоб қайтарилишини айтди. Аббос Ароқчига кўра, Исроил тажовузига жавоб бериш, БМТ низомининг 51-моддасига мувофиқ, Эроннинг қонуний ва легитим ҳуқуқи ҳисобланади.
Сионистик режим бу ҳужумни АҚШнинг мувофиқлаштируви ва розилигисиз амалга оширолмас эди. Асосий ҳомий сифатида АҚШ ҳам бу оқибатлар учун тўлиқ жавобгарликни ўз зиммасига олади, деган вазир.
АҚШ давлат котиби Марко Рубио ҳарбий операцияда АҚШнинг иштироки ва ёрдами бўлмаганини таъкидлаб ўтган.
Бугун тунда Исроил Эронга қарши бир томонлама чора кўрди. Биз бу ҳаракатда иштирок этмаяпмиз ва бизнинг устувор вазифамиз минтақадаги Америка кучларини ҳимоя қилишдир, дейилади унинг баёнотида.
Изоҳ (0)