Ўзбекистон Транспорт вазирлиги айни вақтда қайси мамлакатлар билан мунтазам авиақатновлар амалга оширилаётгани тўғрисидаги рўйхатни эълон қилди. Рўйхатда 18 та хорижий мамлакатлар билан ҳафтасига 28 та йўналиш бўйича 144 та парвозлар амалга оширилаётгани келтирилган.

Ўзбекистон фуқаролари байрам кунлари қуйидаги хорижий давлатларга авиақатновлар орқали ташриф буюриши мумкин:

• Туркия, 40 та рейс (Тошкент–Истанбул, Самарқанд–Истанбул, Фарғона–Истанбул);
• Қозоғистон, 34 та рейс (Тошкент–Олмаота, Самарқанд–Олмаота, Урганч—Ақтов, Нукус—Ақтов, Нукус—Ақтўбе);
• Россия, 22 та рейс (Тошкент—Москва, Самарқанд—Москва, Самарқанд—Санкт-Петербург);
• БАА, 16 та рейс (Тошкент—Дубай, Тошкент—Шаржа);
• Жанубий Корея, 4 та рейс (Тошкент—Сеул);
• Тожикистон, 4 та рейс (Тошкент—Душанбе);
• Беларусь, 4 та рейс (Тошкент—Минск);
• Қирғизистон, 3 та рейс (Тошкент—Бишкек);
• Миср, 3 та рейс (Тошкент—Қоҳира, Тошкент—Шарм аш-Шайх);
• Грузия, 2 та рейс (Тошкент—Тибилиси);
• Германия, 2 та рейс (Тошкент—Мюнхен);
• Ҳиндистон, 2 та рейс (Тошкент—Деҳли);
• Кувайт, 2 та рейс (Тошкент—Кувайт);
• Латвия, 2 та рейс (Тошкент—Рига);
• АҚШ, 2 та рейс (Тошкент—Нью-Йорк);
• Эрон, 1 та рейс (Тошкент—Теҳрон);
• Исроил, 1 та рейс (Тошкент—Тель-Авив);
• Саудия Арабистони, 1 та рейс (Тошкент—Ар-Риёд).

«Gazeta.uz»нинг ёзишича, мунтазам рейслардан ташқари туристик агентликлар мунтазам рейслар амалга оширилмайдиган мамлакатларга бир марталик (чартер) парвозларни ташкиллаштирмоқда. Уларнинг рўйхати билан Транспорт вазирлиги ҳузуридаги «Ўзавиация» агентлиги сайти орқали танишиш мумкин.

Вазирлик ваколатли орган билан келишилмаган рейсларга чипталар сотилиши мумкин бўлган ҳолатлар ҳақида огоҳлантирган. Сўнгги ойларда бу каби бир неча ҳолатлар содир бўлган.

«Одатда чартер рейслар мижозлар тўпланишга қараб ташкиллаштирилади ва чипталар парвоз куни ёки самолёт қўнишидан олдин берилади. Чартер ташкилотчиси парвозни тайёрлаш, шу жумладан, барча керакли ҳужжатларни тайёрлаш бўйича барча масъулиятни ўз зиммасига олади, яъни чартер рейсни амалга ошираётган йўловчи ушбу турдаги парвозни ташкил этишда ҳеч қандай муаммога дуч келмаслиги керак», — дейилади вазирлик матбуот хизмати хабарида.

Аввалроқ Урганчда жадвалда бўлмаган рейсга чипта сотган Россия авиакомпаниясига қўйилган тақиқ олиб ташлангани тўғрисида хабар берилганди.