Миср президенти Абдулфаттоҳ ас-Сиси Судан ва Исроил ўртасидаги муносабатларни яхшилашга қаратилган ҳаракатларни маъқуллашини маълум қилди, деб хабар беради «Интерфакс».
«Мен АҚШ, Судан ва Исроилнинг икки мамлакат ўртасидаги муносабатларни яхшилашга бўлган ҳамкорликдаги уринишини маъқуллайман», — дейди Миср президенти. Шунингдек, у «минтақада тинчлик ва барқарорликни таъминлашга қаратилган ҳар қандай ҳаракатни қадрлашини» билдирган.
Мазкур ҳолатга Европа давлатлари ҳам ижобий баҳо бера бошлаган. Масалан, Австрия канцлери Себастьян Курц «Судан Эрон билан муносабатларини яхшилаётганини эшитишдан» хурсанд эканлигини айтган. «Қолган араб давлатлари ҳам улар ортидан эргашишига умид қиламиз», — деб ёзади Курц ўзининг Twitter’даги саҳифасига.
Шу билан бирга, Фаластинни озод қилиш ташкилоти расмий вакили Васел Абу Юсуф ушбу битимни танқид қилиб, бу фаластинликлар учун — «орқадан берилган янги зарба» эканлигини айтган. ХАМАС ҳаракати ҳам ушбу келишувга танқидлар ёғдириб, уни «нотўғри йўналишдаги қадам» деб атаган.
Эслатиб ўтамиз, 23 октябрь куни Оқ уй Исроилнинг БАА ва Баҳрайн билан муносабатлари яхшиланиши ортидан навбат Суданга келганини эълон қилди. АҚШ президенти Дональд Трамп Саудия Арабистони ҳам тез орада мусулмон давлатларининг Исроил билан алоқаларини яхшилашга қўшилишига умид билдирган.
Мавзуга доир: Баҳрайн ва Исроил расман дипломатик алоқалар ўрнатди
Изоҳ (0)