Ғайриоддий таъмли нарсалар, масалан, бўр, муз, оҳак ёки бўёқни истеъмол қилиш истаги анемия (камқонлик) ривожланаётгани сабабли юзага келиши мумкин. Бу ҳақда тиббиёт фанлари номзоди, Пирогов номидаги Клиника тиббиёти институти терапия кафедраси доценти Дмитрий Карпенко маълум қилди.
Мутахассиснинг сўзларига кўра, кўплаб беморлар чарчоқ, ҳолсизлик ва тирноқларнинг синувчанлигини анемияга хос аломат деб ҳисоблайди. Бироқ бундай белгилар бошқа кўплаб касалликлар билан ҳам боғлиқ бўлиши мумкин. Шу сабабли анемия ташхисини фақат шифокор томонидан ўтказилган клиник текширув асосида аниқлаш мумкин.
Камқонликнинг энг кенг тарқалган ва классик белгиси бу терининг оқариб кетишидир. Аммо бу ҳолат ҳамма беморларда ҳам яққол кўзга ташланавермайди. Айниқса, териси қорамтир бўлган инсонларда бу белги камроқ сезилади. Шу боис Карпенко одамларни шиллиқ қаватларнинг оқариши, кўз оқининг кўкимтир тусга кириши каби нозик белгиларни эътиборсиз қолдирмасликка чақирди.
Бундан ташқари, таъм сезишдаги ўзгаришлар — тиббиётда пикатсизм деб аталувчи ҳолат организмда темир моддасининг танқислигидан дарак бериши мумкин. Бу ҳолат айниқса аёллар ва болаларда тез-тез учрайди.
Шифокор таъкидлашича, анемияни даволашда фақат темир етишмовчилигини бартараф этиш кифоя эмас, балки бу танқисликка нима сабаб бўлганини аниқлаш ҳам муҳим. Мисол учун, агар қон йўқотиш анемияга сабаб бўлган бўлса, унинг манбасини топиш ва уни тўхтатиш зарур. Темир моддаси танқислиги эса модданинг ёмон сўрилиши ёки сурункали йўқотишлар (масалан, аёлларда оғир ҳайз кўриш ёки ички қон кетишлар) билан боғлиқ бўлиши мумкин.
Шифокор ҳар қандай ўзгаришларда ўз-ўзича даволаниш билан шуғулланиш эмас, балки мутахассисга мурожаат қилиш зарурлигини эслатди. Анемия ўз вақтида аниқланмаса, юрак-қон томир тизими, иммунитет ва ҳатто когнитив фаолиятга ҳам салбий таъсир кўрсатиши мумкин.
Изоҳ (0)