G‘ayrioddiy ta’mli narsalar, masalan, bo‘r, muz, ohak yoki bo‘yoqni iste’mol qilish istagi anemiya (kamqonlik) rivojlanayotgani sababli yuzaga kelishi mumkin. Bu haqda tibbiyot fanlari nomzodi, Pirogov nomidagi Klinika tibbiyoti instituti terapiya kafedrasi dotsenti Dmitriy Karpenko ma’lum qildi.
Mutaxassisning so‘zlariga ko‘ra, ko‘plab bemorlar charchoq, holsizlik va tirnoqlarning sinuvchanligini anemiyaga xos alomat deb hisoblaydi. Biroq bunday belgilar boshqa ko‘plab kasalliklar bilan ham bog‘liq bo‘lishi mumkin. Shu sababli anemiya tashxisini faqat shifokor tomonidan o‘tkazilgan klinik tekshiruv asosida aniqlash mumkin.
Kamqonlikning eng keng tarqalgan va klassik belgisi bu terining oqarib ketishidir. Ammo bu holat hamma bemorlarda ham yaqqol ko‘zga tashlanavermaydi. Ayniqsa, terisi qoramtir bo‘lgan insonlarda bu belgi kamroq seziladi. Shu bois Karpenko odamlarni shilliq qavatlarning oqarishi, ko‘z oqining ko‘kimtir tusga kirishi kabi nozik belgilarni e’tiborsiz qoldirmaslikka chaqirdi.
Bundan tashqari, ta’m sezishdagi o‘zgarishlar — tibbiyotda pikatsizm deb ataluvchi holat organizmda temir moddasining tanqisligidan darak berishi mumkin. Bu holat ayniqsa ayollar va bolalarda tez-tez uchraydi.
Shifokor ta’kidlashicha, anemiyani davolashda faqat temir yetishmovchiligini bartaraf etish kifoya emas, balki bu tanqislikka nima sabab bo‘lganini aniqlash ham muhim. Misol uchun, agar qon yo‘qotish anemiyaga sabab bo‘lgan bo‘lsa, uning manbasini topish va uni to‘xtatish zarur. Temir moddasi tanqisligi esa moddaning yomon so‘rilishi yoki surunkali yo‘qotishlar (masalan, ayollarda og‘ir hayz ko‘rish yoki ichki qon ketishlar) bilan bog‘liq bo‘lishi mumkin.
Shifokor har qanday o‘zgarishlarda o‘z-o‘zicha davolanish bilan shug‘ullanish emas, balki mutaxassisga murojaat qilish zarurligini eslatdi. Anemiya o‘z vaqtida aniqlanmasa, yurak-qon tomir tizimi, immunitet va hatto kognitiv faoliyatga ham salbiy ta’sir ko‘rsatishi mumkin.
Izoh (0)