Кўпчилик кир ювиш кукунини танлашда унинг самарадорлигига эътибор қаратади, аммо таркибидаги кимёвий моддалар соғлиғимизга қандай таъсир қилиши ҳақида деярли ўйламайди. Аслида айрим ювиш воситалари таркибидаги агрессив компонентлар тери орқали организмга салбий таъсир кўрсатиши мумкин. Айниқса, нозик ёки аллергияга мойил терига эга бўлган одамлар буни тезда сезади. Қуйида кир ювиш кукунига аллергия қўзғашининг сабаблари, илк аломатлари ва уни олдини олиш йўллари ҳақида маълумот берилади.
Кир ювиш кукунига аллергия қандай намоён бўлади?
Асосан таркибида кучли кимёвий моддалари бор воситалар терида қичишиш ва ачишишга сабаб бўлади. Уларда юзаки фаол моддалар (surfactant) миқдори жуда юқори бўлади. Бундан ташқари, уларга кўп миқдорда фосфатлар, оқартирувчи компонентлар ва ҳид берувчи моддалар қўшилади. Агар кир ювиш кукунидан ортиқча миқдорда ишлатилса ёки кийим ювилгандан сўнг яхши чайилмаса, ҳолат янада оғирлашади.
Қуйидаги белгилар кир ювиш кукунига аллергияни кўрсатиши мумкин:
- Тери қурийди, шиш ва қуришлар пайдо бўлади;
- Кейинчалик тошма ва қизил доғлар юзага чиқади;
- Баъзан суюқликка тўла майда пуфакчалар (яллиғланмаган, лекин ёрилгач қаттиқ қичишадиган) пайдо бўлади;
- Кўз қовоқлари шишади, кўзлар қизариб ёшланади ва қичишади;
- Баъзида аллергик йўтал ва нафас олишда қийинчилик кузатилади;
- Бурун битади.
Кукундаги фаол моддалар кийимдан терига ўтганда, терининг табиий ёғ ҳимоясини бузади. Фосфатлар эса тери муҳитининг кислотали-ишқорий мувозанатини издан чиқаради — бу эса қичишиш, тошма ва қизаришларга олиб келади. Нафас олиш билан боғлиқ муаммолар эса кўпинча сунъий ҳид берувчи моддаларнинг кўплиги сабабли юзага келади. Тери қанчалик нозик бўлса, аллергик реакция шунчалик кучли бўлади.
Агар аллергия сабаби кир ювиш кукуни бўлса, нима қилиш керак?
Бундай ҳолатда янги восита танлаш керак, бунинг учун унинг таркибига алоҳида эътибор қаратиш лозим:
- Юзаки фаол моддалар миқдори 15% дан ошмаслигига ишонч ҳосил қилиш керак;
- Болалар учун мўлжалланган кукунларга ўтиш лозим — уларга кўпинча ҳид берувчи моддалар қўшилмайди;
- Кийимни ювгандан кейин албатта яхшилаб чайиш зарур.
Шунингдек, аллерголог шифокор билан маслаҳатлашиш тавсия этилади. У юзага келган белгиларни бартараф этувчи антигистамин препаратларини тавсия қилади.
Изоҳ (0)