АҚШ ҳукумати самарадорлик департаменти (DOGE) бошлиғи, миллиардер Илон Маск АҚШ президенти Дональд Трампнинг сайлов кампанияси пайтида тез-тез гиёҳванд моддалар истеъмол қилгани маълум бўлди. Бу ҳақда The New York Times (NYT) газетаси ўз манбаларига асосланиб хабар бермоқда.
“Маскнинг гиёҳванд моддалар истеъмоли тасодифий фойдаланиш доирасидан анча ошиб кетган. У атрофидагиларга кучли оғриқсизлантирувчи бўлмиш кетаминни шунчалик кўп истеъмол қилаётганини, бунинг натижасида сийдик пуфагига таъсир кўрсатаётганини айтган. Бу сурункали истеъмолнинг маълум оқибатидир”, дея таъкидланади мақолада.
Нашр маълумотларига кўра, Маск экстази ва галлюциноген қўзиқоринларни ҳам истеъмол қилган. У таркибида 20 га яқин таблетка, жумладан, аддералл стимулятори бўлган дори қутисини ўзи билан олиб юрган.
Бироқ DOGE раҳбари Оқ уйда давлат хизматчиси сифатида доимий ишлаганида гиёҳванд моддаларни истеъмол қилган-қилмагани номаълум.
NYT нашрининг таъкидлашича, шу билан бирга сайлов пайтида Маскнинг оилавий ҳаёти анча мураккаб кечган. Бу унинг фарзандлари иштирок этган тез-тез бўлиб турган суд жараёнлари билан боғлиқ бўлган.
29 май куни АҚШ ҳукумати самарадорлик департаменти (DOGE) раҳбари Илон Маск ўз лавозимини тарк этаётганини эълон қилди.
У Трампнинг солиқ имтиёзларини узайтириш ва АҚШдаги иммиграцияни қатъий назорат қилишга доир қонун лойиҳасини танқид қилганидан кейин бу қарорини эълон қилди. Унинг танқидий муносабати 28 май куни CBC телеканалида узатилди.
Маскка кўра, мазкур қонун лойиҳаси “кенг кўламли харажатлар тўғрисидаги қонун лойиҳаси” ҳисобланади. Бу федерал дефицитни оширади ва DOGE “фаолиятига путур етказади”. Оқ уйдаги аноним манба Маскнинг ўз лавозимини тарк этаётганини тасдиқлаган.
Маскнинг DOGE раҳбари сифатидаги фаолияти минглаб ишдан бўшатиш, давлат идоралари ва дастурларини тугатишни ўз ичига олган. Маск ўз ишини Оқ уй харажатларини 2 триллион доллардан 1 триллион долларгача қисқартириш ҳақидаги баёнотлардан бошлаган. Амалда уларни 150 миллиард долларга қисқартирган ва федерал амалдорларнинг қаршилигидан норози бўлган.
Изоҳ (0)