Америкалик миллиардер Илон Маскнинг SpaceX компаниясига тегишли Starship ракетаси тўққизинчи синов парвози пайтида носозликка учради. Бу ҳақда компания ўзининг Х ижтимоий тармоғида маълум қилди.
Маълум қилинишича, 27 май куни космик кема орбитага чиққан, бироқ маълум вақт ўтгач, унинг парвоз баландлигини бошқариш тизими ишдан чиққан. Ер атрофида бир марта айланишдан сўнг, Starship бошқарувни йўқотган ва Ҳинд океани устида атмосферага киришни бошлаган.
Парвоз бошланганидан 10 дақиқа ўтгач, космик кема билан алоқа узилган. У Австралиянинг шимоли-ғарбида юмшоқ қўнишни амалга ошириши керак эди.
SpaceX хабар беришича, парвоз пайтида техник сабабларга кўра, синов доирасида режалаштирилган саккизта Starlink мини сунъий йўлдош имитаторларини чиқариш учун люк очилмаган. Илгари ракета саккиз марта учирилган бўлиб, шулардан фақат тўрттаси муваффақиятли бўлган эди.
Илон Маск Starship’ни ривожлантириш учун миллиардлаб доллар сарфлаган. Бу ташаббус унинг космик кема ёрдамида Марс сайёрасини мустамлака қилиш режасининг бир қисмидир. SpaceX 50 йилдан ортиқ вақт ичида биринчи марта одамларни Ойга юбориш учун АҚШ давлат агентлиги — НАСА билан ишламоқда.
Тез-тез учраб турадиган носозликлар ва ракеталарнинг катта ўлчамлари сабабли SpaceX’нинг синов парвозлари ҳозиргача бир неча бор АҚШнинг жанубий штатлари ҳамда Кариб денгизи ҳудудларига ракета бўлакларининг тушишига сабаб бўлган.
Маълумот ўрнида, Starship космик кемаси еттинчи ва саккизинчи синов парвози вақтида портлаб кетганди.
Изоҳ (0)