AQSh hukumati samaradorlik departamenti (DOGE) boshlig‘i, milliarder Ilon Mask AQSh prezidenti Donald Trampning saylov kampaniyasi paytida tez-tez giyohvand moddalar iste’mol qilgani ma’lum bo‘ldi. Bu haqda The New York Times (NYT) gazetasi o‘z manbalariga asoslanib xabar bermoqda.
“Maskning giyohvand moddalar iste’moli tasodifiy foydalanish doirasidan ancha oshib ketgan. U atrofidagilarga kuchli og‘riqsizlantiruvchi bo‘lmish ketaminni shunchalik ko‘p iste’mol qilayotganini, buning natijasida siydik pufagiga ta’sir ko‘rsatayotganini aytgan. Bu surunkali iste’molning ma’lum oqibatidir”, deya ta’kidlanadi maqolada.
Nashr ma’lumotlariga ko‘ra, Mask ekstazi va gallyutsinogen qo‘ziqorinlarni ham iste’mol qilgan. U tarkibida 20 ga yaqin tabletka, jumladan, adderall stimulyatori bo‘lgan dori qutisini o‘zi bilan olib yurgan.
Biroq DOGE rahbari Oq uyda davlat xizmatchisi sifatida doimiy ishlaganida giyohvand moddalarni iste’mol qilgan-qilmagani noma’lum.
NYT nashrining ta’kidlashicha, shu bilan birga saylov paytida Maskning oilaviy hayoti ancha murakkab kechgan. Bu uning farzandlari ishtirok etgan tez-tez bo‘lib turgan sud jarayonlari bilan bog‘liq bo‘lgan.
29-may kuni AQSH hukumati samaradorlik departamenti (DOGE) rahbari Ilon Mask o‘z lavozimini tark etayotganini e’lon qildi.
U Trampning soliq imtiyozlarini uzaytirish va AQSHdagi immigratsiyani qat’iy nazorat qilishga doir qonun loyihasini tanqid qilganidan keyin bu qarorini e’lon qildi. Uning tanqidiy munosabati 28-may kuni CBC telekanalida uzatildi.
Maskka ko‘ra, mazkur qonun loyihasi “keng ko‘lamli xarajatlar to‘g‘risidagi qonun loyihasi” hisoblanadi. Bu federal defitsitni oshiradi va DOGE “faoliyatiga putur yetkazadi”. Oq uydagi anonim manba Maskning o‘z lavozimini tark etayotganini tasdiqlagan.
Maskning DOGE rahbari sifatidagi faoliyati minglab ishdan bo‘shatish, davlat idoralari va dasturlarini tugatishni o‘z ichiga olgan. Mask o‘z ishini Oq uy xarajatlarini 2 trillion dollardan 1 trillion dollargacha qisqartirish haqidagi bayonotlardan boshlagan. Amalda ularni 150 milliard dollarga qisqartirgan va federal amaldorlarning qarshiligidan norozi bo‘lgan.
Izoh (0)