Bloomberg Billionaires Index маълумотларига кўра, Microsoft компаниясининг собиқ бош директори Стив Балмернинг бойлиги биринчи марта 100 миллиард доллардан ошди.
Bloomberg қайд этишича, 7 июль кун давомида бизнесменнинг бойлиги 731 миллион долларга ўсиб, 101 миллиард долларга етган. Натижада у бойлиги 100 миллиард доллардан ортиқ бўлган дунёдаги тўққизинчи одамга айланди. 2000 йилдан 2014 йилгача Microsoft бош директори бўлган Балмер ҳозирда Los Angeles Clippers баскетбол клубига эгалик қилади.
Oracle асосчиларидан бири Ларри Эллисон бойлиги 100 миллиард доллардан ошган ўнинчи одам бўлишига бир бахя қолди. 7 июль кунги савдо якунларига кўра, унинг бойлиги 2,24 миллиард долларга кўпайиб, 98,6 миллиард долларга етган.
Amazon асосчиси Жефф Безос дунёдаги энг бой одамлар рейтингида етакчи бўлиб қолмоқда. Bloomberg хабарига кўра, бизнесменнинг бойлиги 212 миллиард долларга баҳоланмоқда, бу рекорд кўрсаткич. Агентликнинг таъкидлашича, бундай ўсишга Пентагоннинг 2019 йилда Microsoft билан тузган 10 миллиард долларлик «булутли» сақлаш инфратузилмасини яратиш бўйича шартноманинг бекор қилиши ҳақидаги янгиликлар ҳам таъсир кўрсатган.
Улардан кейин Alphabet асосчилари Ларри Пейж ва Сергей Брин (мос равишда 115 миллиард ва 111 миллиард доллар) турибди. Саккизинчи ўринда 101 миллиард долларлик бойлиги билан америкалик инвестор Уоррен Баффетт бормоқда.
Изоҳ (0)