Исроил 28 май куни Бирлашган Миллатлар Ташкилотини Ғазога ёрдам етказилишига тўсқинлик қилаётганликда айблади. Бу ҳақда Al Arabiya хабар берди.
БМТ эса бу айбловга жавобан Исроил рухсат берган чекланган ёрдамни тўплаш учун бор кучини сарфлаётганини билдирган.
Ғазодаги гуманитар аҳвол ниҳоятда оғир — озиқ-овқат хавфсизлиги бўйича мутахассислар ҳар беш кишидан бири очарчилик ёқасида турганини маълум қилган.
“БМТ ваҳима тарқатиб, ҳақиқатдан узоқ баёнотлар бераётган бир пайтда, Исроил давлати Ғазога ёрдам киришини изчил таъминламоқда”, деди Исроилнинг БМТдаги элчиси Данни Данон Хавфсизлик кенгашида.
Унга кўра, ёрдам сўнгги ҳафтадан бери Исроил томонидан чекланган рухсат асосида Керем Шалом чегара ўтказиш пункти орқали юк машиналарида кириб келмоқда. АҚШ ва халқаро ҳамкорлар билан биргаликда ишлаб чиқилган янги тақсимот механизми орқали ҳам ёрдам тарқатилмоқда. БМТ эса бу тизимни ўзининг гуманитар тамойилларига зид деб билади.
27 май куни Ғазо гуманитар жамғармаси (ҒГЖ) марказида ёрдам тарқатиш чоғида юз берган тартибсизликда 47 киши жароҳат олган. Исроил элчиси бу ҳодисада ҲАМАСни айблаб, Фаластин гуруҳи тақсимлаш марказига киришни тўсиб қўйиш учун йўл тўсиқлари ва блокпостлар ўрнатганини айтган.
“БМТ бу янги гуманитар механизмда қатнашаётган нодавлат нотижорат ташкилотларга босим, таҳдид ва жазолаш чораларини қўллаяпти”, деди Данон БМТни ёрдамга тўсқинлик қилишга уринишда айблаб.
Шунингдек, Данон БМТни ҒГЖ билан ишлаётган нодавлат ташкилотларни Ғазода фаолият юритувчи ташкилотлар рўйхатидан олиб ташлаганликда ҳам айблаган. БМТ бу даъвони рад этган.
“Ҳозирги рўйхат билан ҒГЖ бошланишидан олдинги рўйхат ўртасида ҳеч қандай фарқ йўқ. Биз ўз гуманитар тамойилларимизга мос келмайдиган операцияларда иштирок эта олмаймиз”, деди БМТ бош котибининг вакили Стефан Дужаррик.
Шунингдек, у БМТ Керем Шалом орқали келаётган ёрдамни тўплаш учун бор имкониятларини ишга солаётганини қўшимча қилди.
Ўтган ҳафтадан бери Исроил томонидан озиқ-овқат ортилган 800 та юк машинасига рухсат берилган. Бироқ Дужаррикнинг айтишича, уларнинг 500 тасигина Ғазога кирган. Данон эса “400 дан ортиқ юк машинаси” аллақачон чегара оша ўтганини, Исроил эса ёрдам тақсимоти учун “хавфсиз йўллар” яратганини таъкидлаган.
Исроилнинг Ғазодаги ҳарбий ҳаракатлари натижасида, ҳозиргача 54804 киши ҳалок бўлган, уларнинг аксарияти тинч аҳоли. Исроил бу ҳаракатларни 2023 йил 7-октябрь куни ҲАМАС томонидан уюштирилган ҳужумга жавобан бошлаган.
Изоҳ (0)