Миллионерлар апокалипсисга тайёргарлик кўрмоқда

АҚШ президенти Дональд Трамп томонидан Иқлим бўйича Париж келишувидан чиқишнинг эълон қилиниши кутилмаган оқибатларга олиб келди. Борган сари кўпроқ америкалик миллионерлар экстремал об-ҳаво шароитлари юзага келиш эҳтимолининг ошишидан хавфсираб  махсус барпо этилган бошпаналарга қизиқиш билдирмоқда, деб ёзади «Газета.ru».

Охирги вақтларда тобора кўпроқ америкалик миллионерлар турли тоифадаги ҳалокатлар — қутблар силжишидан тортиб ядро урушига тайёргарлик кўришни бошламоқда. Бундай тайёргарликнинг босқичларидан бири сайёранинг нисбатан хавфсизроқ ҳудудларидан ер харид қилиш кўринишида кечмоқда.

АҚШнинг марказий қисми — Колорадо, Монтана, Небраска, Нью-Мексико, Шимолий Дакота, Техас ва Вайоминг каби штатлари «охир замон»дан кейинги кескин шароитларда яшаш учун мос келади деб ҳисобланади. Уларда иқлим юмшоқроқ бўлиб, океанлар (қутблар эрий бошлаган ҳолатда кенг кўламли сув тошқинларига сабаб бўлиши мумкин бўлган) эса анча узоқда жойлашган.

Forbes маълумотига кўра, ушбу штатларда аллақачон америкалик бойваччалар томонидан барпо этилган бир нечта мустаҳкам бомбапаноҳгоҳ мавжуд.

LinkedIn асосчиларидан бири ва машҳур инвестор Рейд Хоффман The New Yorker нашрига жорий йилнинг январида берган интервьюсида ҳикоя қилишича, Кремний водийсидаги 50 фоиздан ортиқ миллиардерлар ўзига хос «апокалипсисдан суғурта», масалан, ерости бункерлари харид қилган.

Forbes журналисти Жим Добсоннинг сўзларига қараганда, кўпчилик миллионерлар исталган дақиқада бошпанага қочиш учун тайёр самолётларга эга, бункерларда эса автомобиллар, мотоцикллар, қурол-яроғ ва электр энергиясининг автоном генераторлари бор.

Бироқ ҳозирча ҳеч бир миллиардер марказий штатлардан сотиб олинган катта ўлчамдаги ерлар апокалипсисга тайёргарлик кўриш учун харид қилинганлигини тан олмади.

Ўз даромадини кабел ва коммуникация технологиялари соҳаси орқали қўлга киритган Жон Мелоун АҚШда йирик хусусий ер эгаларидан бири ҳисобланади. Унга тегишли бўлган олти штатдаги ҳудуд 2,2 миллион акрдан (9 минг квадрат метр атрофида) ошади. Бу эса Делавер штати майдонидан икки баробар ёки Манхэттен оролидан 151 марта каттароқдир. 2011 йилда Мелоун Forbesга ерларни харид қилиш одатий инвестиция эканлиги ва ўз ерларида балиқ овлаш, баъзан эса қушларни овлашни хуш кўришини маълум қилган эди.

Медиамагнат Тед Тернер Колорадо, Канзас, Монтана, Небраска, Нью-Мексико ва Жанубий Дакотада 2 миллион акр (8 минг квадрат километр) ер майдонига эга. Ана шундай катта ер эгаларидан яна бири Amazon раҳбари Жефф Безосдир.

Кўчмас мулк сотишга ихтисослашган компаниялар бундай қулай вазиятни қўлдан чиқармасдан, қиймати уч миллион доллардан бошланувчи премиум классдаги бошпаналарни тобора кўпроқ қурмоқда.

Ҳарбий базалар ёки ракета учириш учун мўлжалланган конларда қурилган мазкур уйлар махсус хавфсизлик функциялари, масалан ядро портлашидан ҳимоя қилувчи эшиклар, зирҳли автомобиллар ҳамда озиқ-овқат ва сув заҳираларига эга.

Даллас яқинида (Техас штати) бир йўла 400 та ерости кўп хонадонли уй (1 600 одамга мўлжалланган) қурилмоқда. Уларнинг баҳоси 300 миллион доллардан бошланади. Унинг яратувчилари Trident Lakes лойиҳасини тўлиқ жанговар шайликдаги беш юлдузли курорт деб атамоқда. 700 акр (уч квадрат километр) майдонда нафақат уйлар, балки гольф учун майдон, спа-марказ, бассейнлар, югуриш йўлакчалари, от спорти комплекси, дўконлар ва ресторанлар ҳам жойлашади. Тhe Houston Chronicle маълумотига кўра, аҳоли у ерда 2018 йилдан яшай бошлаши мумкин.

Шуни таъкидлаш жоизки, мазкур уйлар эркин сотувда пайдо бўлмаса керак. Ҳозирча қурувчи компаниялар шахсий таклифномаларни тарқатмоқда, қолган истовчилар учун сайтда махсус анкета тўлдириш таклиф этилмоқда. Унда ёши, маълумоти, судланганлик ва ҳатто экстремал вазиятларда ўзини қандай тутиши ҳақидаги саволларга жавоб бериш керак бўлади.