Bloomberg молия оламидаги энг нуфузли шахслар номини ошкор этди

Bloomberg агентлиги молия оламидаги энг нуфузли 50 шахсдан иборат рейтингни эълон қилди. Ушбу рейтингга биринчи марта Россия президенти Владимир Путин киритилди. Биринчи ўринни Буюк Британия бош вазири Тереза Мэй эгаллаган бўлса, иккинчи ўринни АҚШ президентлигига номзодлар Дональд Трамп ва Ҳиллари Клинтон бўлишиб олди.

Рейтингнинг дастлабки ўнлиги — «РБК» фотожамланмасида.

1. Тереза Мэй — Буюк Британия бош вазири

Буюк Британиянинг янги бош вазири Bloomberg таҳлилчиларини Brexit масаласидаги дадиллиги билан ҳайрон қолдирди. Аввал бошида у Буюк Британиянинг Европа Иттифоқи таркибидан ажралишига қарши чиқаётган эди. Агентликнинг фикрича, Лондоннинг Европа молия маркази сифатидаги мавқеи янги бош вазир бизнес билан қай даражада муваффақиятли келишиб олишига боғлиқ.

2. Дональд Трам — АҚШ президентлигига номзод

АҚШ президенти сифатида ким сайланиши жаҳон молия бозорининг келажагини кўп жиҳатдан белгилаб беради. Bloomberg президентликка даъво қилаётган миллиардер давлат қарзи ва эркин савдо-сотиқ муаммоларини қандай ҳал қилишини қизиқиш билан кузатишини билдириб ўтди.

3. Ҳиллари Клинтон — АҚШ президентлигига номзод

Агар сайловларда Клинтон хоним ғалаба қозонса, у ҳолда собиқ давлат котиби юритадиган сиёсатнинг асосий вазифаларидан бири солиққа тортиш тизимини қайта кўриб чиқиш бўлади.

4. Си Цзиньпин — Хитой раиси

Хитой раисининг бундан буён ЯИМ тушиши ва давлат қарзининг ўсишига йўл қўймаслик ҳақидаги ваъдаси жаҳон молия бозори барқарорлиги учун жуда муҳим аҳамиятга эга, деб ҳисоблайди Bloomberg. Агар ушбу ваъда бажарилмаса, бозор қулайди.

5. Жефф Безос — Amazon асосчиси

Безоснинг таъсири ва мавқеи охирги пайтларда яққол сезилмоқда. Ҳозирча унинг бирорта рақиби натижаларига кўра Безосга яқинлаша олмади. Тадбиркорнинг шахсий бойлиги ҳам ўсиб бормоқда — жорий йилда у 68 миллиард доллар пул билан Bloomberg версияси бўйича жаҳоннинг учинчи энг бой инсони деб топилди.

6. Ангела Меркель — Германия канцлери

Меркель хонимнинг муҳожирлар масаласидаги сиёсати унинг позициясига бир қадар путур етказди. Унинг партияси — «Христиан-демократик иттифоқ»нинг сайловлардаги натижаларига кўра хулоса қилинса, Меркель 2017 йилда қайта сайланиши шубҳа остида қолади, деб ҳисоблайди агентлик экспертлари. Шунга қарамай, ҳозирча Европанинг энг йирик иқтисодиётини бошқаришда унинг ўрнини эгаллайдиган бирор жиддий рақобатчи йўқ.

7. Марио Драги — Европа марказий банки раҳбари

Драги Европа марказий банкини қўрқитиш бефойдалигини кўрсатди: Британия Иттифоқ таркибидан чиқишга қарор қилганида у «пинагини ҳам бузмади», лекин бу қадам Европа иқтисодиётига зарар келтиришини айтиб ўтди. Яқин йилларнинг барқарор келиш-келмаслиги айнан шу шахсга боғлиқдир.

8. Жанет Йеллен — АҚШ Федерал захира тизими раиси

Ўз навбатида, АҚШ иқтисодиётининг барқарорлиги Йеллен хонимга боғлиқ. Мамлакат иқтисодиётининг ўсиши кўп жиҳатдан Йелленнинг асосий ставкани бошқариш бўйича сокин ва ишончли хатти-ҳаракатлари туфайли давом этмоқда.

9. Уоррен Баффет — америкалик инвестор

Баффет ўз соҳаларида етакчи ўринни эгаллаб келаётган компанияларга муваффақиятли инвестицион киритмалари туфайли тўққизинчи ўринга муносиб кўрилди.

10. Сержио Моро — Бразилия федерал судьяси

Айнан Моро ўз прокурорлари жамоаси билан биргаликда Бразилияни рецессияга, мамлакат собиқ президенти Дилма Руссеффни эса импичментга олиб келган коррупцион жанжални икки йил давомида тергов қилди.