АҚШдаги президентлик сайловларида Дональд Трамп ғалаба қозонган тақдирда миллиардер Илон Маскни ўзининг маслаҳатчиси этиб тайинламоқчи. Бу ҳақда манбаларга таяниб, Wall Street Journal (WSJ) хабар берди.
Маълум қилинишича, Трамп чегара хавфсизлиги ва иқтисодиёт билан боғлиқ сиёсатларга расмий таъсир кўрсатиш бўйича Маск билан музокара ўтказган. Миллиардер ҳам сўнгги пайтларда ушбу масалалар бўйича очиқ гапирмоқда.
“Маск ва яна бир миллиардер инвестор Нелсон Пелц элита доираларида амалдаги президент Жо Байденнинг қайта сайланишини қўллаб-қувватламасликка кўндириш учун кампания олиб бормоқда”, — дейилади хабарда.
Икки йил олдин Трамп ва Маск ўртасидаги муносабатлар кескин эди. Иккаласи ҳам омма олдида бир-бирини ҳақорат қилганди, аммо энди улар ўртасида дўстона алоқалар ўрнатилмоқда.
Манбаларга кўра, Трамп ва Маск ойига бир неча марта телефонда мулоқот қилган. Улар иммиграция, технология, илм-фан, шунингдек, АҚШ космик кучларини ривожлантириш масалалари ҳақида гаплашган. Хабарда Трампнинг гўёки миллиардерга Marvel собиқ раҳбари Айл Перлмуттернинг вазифасига ўхшаш ролни таклиф қилгани ҳақида гап боради.
Перлмуттер Трамп президентлигида фахрийлар ишлари бўйича Департамент маслаҳатчиси бўлиб ишлаган. Маск Трамп президентлиги даврида Оқ уйнинг бизнес бўйича маслаҳат гуруҳларида ишлаган, бироқ 2017 йилда Трампнинг АҚШни иқлим бўйича Париж келишувидан чиқариш қарорига рози бўлмагани сабабли истеъфога чиққанди.
Изоҳ (0)