Туркияда STM NETA 300 номли янги сув ости дрони муваффақиятли синовдан ўтказилди. У ҳарбий-денгиз кучларининг миналарга қарши кураш миссияларида қўлланилиши кутилмоқда. Бу ҳақда Anadolu хабар берди.
STM NETA “Учувчисиз автоном сув ости транспорт воситаси” лойиҳаси доирасида ишлаб чиқилган. Дрон биринчи марта 2024 йил 22 октябрда SAHA EXPO кўргазмасида тақдим этилган. STM компанияси Туркияда денгиз платформалари ва автоном тизимлар соҳасида етакчи ҳисобланади.
“Яқинда STM NETA 300 нинг денгиз синовларини бошладик. Денгиз техникаси, автоном платформалар ва қўмондонлик-бошқарув тизимлари имкониятларини бирлаштириб, техникани очиқ денгизга олиб чиқишга муваффақ бўлдик.
Бассейн синовлари якунлангач, денгиз синовлари босқичида платформанинг сенсорлари, камералари ва автоном навигация тизимлари текширилди. Энди тизимнинг умумий ишлашини текшириб кўрсак бўлади,” деди STM бош директори Ўзгур Гулеруз.
STM NETA 300 метргача чуқурликда ишлай олади. Дрон ён томондан сканерловчи ва бўшлиқни тўлдирувчи сонар (товуш импулсларини чиқариб, уларнинг қайтишини аниқлайдиган ва ўлчайдиган қурилма) билан жиҳозланган. Қурилма миналарни аниқлаш ва тозалаш ишлари билан шуғулланади.
Изоҳ (0)