Хитойлик олимлар “Тянгонг” космик станцияси бортида коинотдаги оғир шароитларга бардош бера оладиган ноёб хусусиятларга эга янги бактерияни аниқладилар. Тадқиқот натижалари International Journal of Systematic and Evolutionary Microbiology журналида эълон қилинди.
Бактерияга Niallia tiangongensis деб ном берилди ва у узоқ муддатли парвозлар шароитида микроб фаоллигини кузатиш учун станция ускуналари юзасидан ажратиб олинди. Бу бактерия тупроқда, оқава сувларда ва ҳатто инсон ичагида учрайдиган Ердаги Niallia circulans бактериясига яқин экани аниқланди. Бироқ унинг космик тури радиация ва стрессга чидамлиликни оширадиган бир қатор ўзгаришларга эга.
Тадқиқотчиларнинг таъкидлашича, Niallia tiangongensis желатинни парчалаш қобилиятига эга ва биоплёнка ҳосил қилиш хусусияти кучайган — бу чекланган ресурсли муҳитда яшаб қолиш учун муҳимдир. Ушбу хусусиятлар бактерияни ҳам космик тиббиёт соҳасида, ҳам Ерда, жумладан қишлоқ хўжалиги ва биотехнологияда қўллаш учун келажакда ўрганишга арзигулик объектга айлантиради.
“Тянгонг” станцияси коинотда “мослашган” микроорганизмлар топилган ягона жой эмас. 2021 йил март ойида Халқаро космик станцияда илк бор микроблар аниқланган эди.
Олимлар яқинда кашф қилинган 2025 КФ номли астероид 21 май куни тунда Ерга яқинлашишини маълум қилди.
Изоҳ (0)