Қозоғистонда қуввати икки экзафлопга яқин бўлган суперкомпьютер олиб келинди. Бу ҳақда Рақамли ривожланиш, инновациялар ва аэрокосмик саноат вазирлиги хабар берди.
Битта экзафлоп(компьютер тезлигини ўлчовчи бирлик)нинг бажарилиши машина секундига квинтиллион (18 та нолга эга сон) амални бажара олишини англатади. Бу Марказий Осиёдаги энг кучли компьютер экани маълум қилинди.
“Бу Марказий Осиё минтақаси тарихидаги биринчи суперкомпьютер кластеридир. У сунъий интеллект ва юқори самарали ҳисоблаш учун махсус ишлаб чиқилган энг сўнгги NVIDIA H200 график чипларида йиғилади”, дея қайд этди вазирлик.
Суперкомпьютер вазирликнинг янги маълумотлар марказида ўрнатилади. Улар фақатгина тор доирадаги мутахассислар учун эмас, балки мамлакатнинг бутун рақамли экотизимини ривожлантириш учун жумладан, соғлиқни сақлаш, энергетика, таълим, давлат хизматлари ва бошқалар учун ишлайди. Бу Қозоғистоннинг биринчи марта юқори технологияли ускуналарни мамлакатга божсиз ва қўшимча қиймат солиғисиз олиб кириши ҳисобланади.
“Бу мамлакатимизга халқаро IT-компаниялар ва маълумот марказлари операторлари эътиборини тортади. Лойиҳа 2029 йилгача сунъий интеллектни ривожлантириш концепциясини амалга оширишнинг муҳим элементи ва Қозоғистоннинг замонавий IT инфратузилмасини шакллантиришнинг асосий босқичларидан биридир”, деди вазирлик.
Қўшимча қилинишича, нейрон тармоқларни ўқитиш учун қувватга муҳтож бўлган стартаплар, фундаментал ва амалий тадқиқотлар ўтказувчи университетлар, тадқиқот марказлари ва бизнес жараёнларига сунъий интеллектни жорий этувчи компаниялар суперкомпьютерлардан фойдаланиши мумкин бўлади.
Изоҳ (0)