Швейцариянинг Sun-Ways стартапи темир йўллар оралиғига қуёш панеллари ўрнатмоқда. Бу технология ҳали синов тариқасида бўлса-да, бошқа давлатларда ҳам қизиқиш уйғотди. Бу ҳақда Swiss Info хабар берди.
Sun-Ways стартапи доирасида Швейцариянинг ғарбий қишлоғи Буттесдаги темир йўлларга 100 метр қуёш панеллари ўрнатилди. Темир йўлларнинг улкан ер майдонидан фойдаланиб, лойиҳа фотоэлектрик энергия ишлаб чиқаришда инқилоб қилишни мақсад қилган.
“Қуёш панелларини худди уй томига ўрнатгандек ўрнатиб чиқдик. Мунтазам ёмғир ёғаётган бир пайтда қуёш электр станциясини ишга тушириш осон бўлмади. Лекин мен жуда хурсандман”, деди стартап асосчиси Скудери.
Қуёш энергияси темир йўл инфратузилмасига биринчи марта ўрнатилмаяпти. Германия, Италия, Франция ва Япониядаги лойиҳалар ҳам рельслар орасида қуёш панелларини синовдан ўтказмоқда. Бироқ Швейцария лойиҳаси биринчи бўлиб осон ечиладиган тизим ишлаб чиқди. Бошқача қилиб айтганда, керак бўлмаган пайт панеллар осонгина ечиб олиб қўйилиши мумкин бўлади.
Қуёш батареялари қўлда ёки Scheuchzer компанияси ишлаб чиқарган машинада ўрнатилади. Машина бир неча соат ичида 1 000 квадрат метрга яқин қуёш панелларини ўрнатиши ёки йиғиб олиши мумкин. Панелларни тоза сақлаш учун поездлар охирига цилиндрик чўтка жойлаштирилади.
Sun-Ways ўнлаб ҳамкор компаниялар ва Швейцариянинг Инновацияларни рағбатлантириш агентлиги Innosuisse томонидан қўллаб-қувватланган. Дастлабки синов босқичи учун 704,600 доллар ажратилган.
Изоҳ (0)