Жанубий Кореянинг Илмий-технология институти олимлари саратон ҳужайраларини соғлом ҳолатга қайтариш имконини берувчи янги усулни ишлаб чиқди. Бу ёндашув анъанавий даволаш усулларидан фарқли ўлароқ, саратон ҳужайраларини йўқ қилиш ўрнига уларни соғлом ҳолатга қайтаради. Бу ҳақда New Atlas хабар берди.
Профессор Кванг-Хён Чо бошчилигидаги тадқиқотчилар нормал ҳужайраларнинг ген тармоғини рақамли модел орқали таҳлил қилиб, ҳужайраларнинг мутацияга учраб, саратонли ҳолатга ўтиш жараёнини аниқладилар. Маълум бўлишича, MYB, HDAC2 ва FOXА2 каби “мастер-регуляторлар” саратонли ҳужайраларни соғлом ҳолатга қайтаришда асосий рол ўйнайди. Ушбу молекулаларнинг генетик ўсишини тўхтатиш орқали саратон ҳужайралари йўқ қилинмасдан соғлом ҳолатга қайтартилди. Тадқиқот молекуляр ва ҳужайра даражасидаги тажрибалар ҳамда ҳайвонлар устида ўтказилган синовлар билан тасдиқланди.
Тадқиқотнинг аҳамияти
Ушбу ёндашув саратон ҳужайраларини йўқ қилиш ўрнига уларни соғлом ҳолатга қайтаришга қаратилган бўлиб, бу усул анъанавий даволаш усулларига қараганда камроқ ножўя таъсирлар ва юқори самарадорликка эга бўлиши мумкин. Гарчи тадқиқот асосан йўғон ичак саратони устида олиб борилган бўлса-да, бу усул бошқа саратон турларига, масалан, кўкрак, жигар ва қон саратонларига ҳам татбиқ этилиши мумкин. Ёндашув беморнинг генетик ва молекуляр профилига асосланган шахсийлаштирилган даволаш имкониятларини яратади.
Ҳозирда ушбу усул экспериментал босқичда бўлиб, клиник синовлар орқали унинг инсонларда хавфсизлиги ва самарадорлигини аниқлаш зарур. Тадқиқот натижалари Advanced Science журналида чоп этилган ва БиоРеверт Инc. компанияси томонидан амалиётга татбиқ этиш учун қўлланмоқда. Бу ёндашувнинг кенг қўлланиши саратонни даволашда инқилобий ўзгаришларга олиб келади.
Изоҳ (0)