Норвегияда узунлиги 135 метр бўлган NCL Salten контейнер ташувчи кемаси саёзликка тушиб, қирғоқ бўйидаги уй ҳовлисига бориб урилди. Бу ҳақда BBC хабар берди.
Ҳодиса 22 май куни маҳаллий вақт билан тахминан соат 05:00 да содир бўлган. Кема Иоганн Гелберг яшайдиган уйдан атиги бир неча метр нарида тўхтаган. Уй эгасини содир бўлган кутилмаган ҳодисадан унинг қўшниси огоҳлантирган.
Эшик қўнғироғи мен очишни хоҳламайдиган пайтда жаранглади. Деразага яқинлашганимда, улкан кемани кўриб ҳайратда қолдим. Унинг юқори қисмини кўриш учун бўйнимни чўзишга мажбур бўлдим, дейди Иоганн Гелберг.
У ҳеч қандай овозни эшитмагани ва кўрган манзара ўзи учун бутунлай кутилмаган ҳодиса бўлганини айтган.
Бу жуда сюрреалистик эди. Кема яна беш метр жанубга юрса, ётоқхонага етган бўларди. Мен ҳеч нарсани эшитмадим ва бундай воқеа содир бўлиши мумкинлигини тасаввур ҳам қилмаган эдим, дейди Гелберг.
Унинг қўшниси Ёстейн Ёргенсеннинг сўзларига кўра, у тонг саҳарда қирғоқ томон келаётган кеманинг шовқинидан уйғониб кетган ва зудлик билан Гелбергнинг уйига югурган.
Мен у аллақачон ташқарида деб ўйлагандим, лекин йўқ эди. Ҳовли бўш, уй эса ёпиқ эди. Эшик қўнғироғини бир неча бор босдим, аммо ҳеч қандай жавоб бўлмади. Фақат телефон қилганимдагина, у билан боғлана олдим, дейди Ёргенсен.
-1qF8ax1_.avif)
Кипр байроғи остида ҳаракатланаётган NCL Salten кемасида 16 киши бўлган. У жануби-ғарбий йўналишда Трондхайм флоти орқали Оркангер порти томон ҳаракатланаётган эди. Бироқ номаълум сабабга кўра, йўналишдан четга чиқиб, саёзликка тушган.
Ҳодиса оқибатида ҳеч ким жароҳат олмаган. Воқеанинг аниқ сабаблари ҳозирча номаълум, Норвегия полицияси тергов олиб бормоқда.
Изоҳ (0)