Ўзбекистоннинг янги тайинланган элчиси Норвегия қиролига ишонч ёрлиқларини топширди, деб хабар бермоқда “Дунё” АА.
Маълум қилинишича, Ўзбекистоннинг Норвегияга янги тайинланган элчиси (қароргоҳи Стокгольм шаҳрида жойлашган) Раҳматулла Нуримбетов 15 май куни ушбу мамлакат Қироли Харалд V га ишонч ёрлиқларини топширди.
Маросимдан сўнг бўлиб ўтган мулоқот чоғида сиёсий, савдо-иқтисодий, сармоявий, технологик ва маданий-гуманитар соҳаларда Ўзбекистон–Норвегия муносабатларининг ҳолати ва уни ривожлантириш истиқболлари муҳокама қилинди.
Шу билан бирга, иқлим ўзгариши оқибатларига қарши курашиш, “яшил” энергияни ривожлантириш, қашшоқликни камайтириш, аёллар ва ёшларнинг жамиятдаги ролини ошириш каби муҳим йўналишларда икки томонлама ҳамкорликни кенгайтириш учун салмоқли салоҳият мавжудлиги таъкидланди.
Маълумот учун, Ўзбекистон ва Норвегия ўрасидаги дипломатик муносабатлар 1992 йил 10 июнда ўрнатилган. Раҳматулла Нуримбетов 2024 йил 15 октябрь куни Ўзбекистоннинг Швециядаги элчиси сифатида Стокгольм шаҳрига борди ва 4 декабрь куни Қирол Карл XVI Густавга ишонч ёрлиқларини топширди.
2025 йил 31 январда Бахтиёр Ибрагимов Ўзбекистоннинг Альбаниядаги биринчи элчиси этиб тайинлангани ҳақида хабар берилган эди. Равшан Усмонов эса Ўзбекистоннинг Исландиядаги (қароргоҳи Лондон шаҳрида жойлашган) элчиси этиб тайинланди ва 7 февраль куни Исландия президенти Халла Томасдоттирга ишонч ёрлиқларини топширди. 11 февраль куни Ўзбекистон элчиси Темур Раҳмонов Литва президенти Гитанас Науседага ишонч ёрлиқларини топширди.
Изоҳ (0)