Norvegiyada uzunligi 135 metr bo‘lgan NCL Salten konteyner tashuvchi kemasi sayozlikka tushib, qirg‘oq bo‘yidagi uy hovlisiga borib urildi. Bu haqda BBC xabar berdi.
Hodisa 22-may kuni mahalliy vaqt bilan taxminan soat 05:00 da sodir bo‘lgan. Kema Iogann Gelberg yashaydigan uydan atigi bir necha metr narida to‘xtagan. Uy egasini sodir bo‘lgan kutilmagan hodisadan uning qo‘shnisi ogohlantirgan.
Eshik qo‘ng‘irog‘i men ochishni xohlamaydigan paytda jarangladi. Derazaga yaqinlashganimda, ulkan kemani ko‘rib hayratda qoldim. Uning yuqori qismini ko‘rish uchun bo‘ynimni cho‘zishga majbur bo‘ldim, deydi Iogann Gelberg.
U hech qanday ovozni eshitmagani va ko‘rgan manzara o‘zi uchun butunlay kutilmagan hodisa bo‘lganini aytgan.
Bu juda syurrealistik edi. Kema yana besh metr janubga yursa, yotoqxonaga yetgan bo‘lardi. Men hech narsani eshitmadim va bunday voqea sodir bo‘lishi mumkinligini tasavvur ham qilmagan edim, deydi Gelberg.
Uning qo‘shnisi Yosteyn Yorgensenning so‘zlariga ko‘ra, u tong saharda qirg‘oq tomon kelayotgan kemaning shovqinidan uyg‘onib ketgan va zudlik bilan Gelbergning uyiga yugurgan.
Men u allaqachon tashqarida deb o‘ylagandim, lekin yo‘q edi. Hovli bo‘sh, uy esa yopiq edi. Eshik qo‘ng‘irog‘ini bir necha bor bosdim, ammo hech qanday javob bo‘lmadi. Faqat telefon qilganimdagina, u bilan bog‘lana oldim, deydi Yorgensen.
-1qF8ax1_.avif)
Kipr bayrog‘i ostida harakatlanayotgan NCL Salten kemasida 16 kishi bo‘lgan. U janubi-g‘arbiy yo‘nalishda Trondxaym floti orqali Orkanger porti tomon harakatlanayotgan edi. Biroq noma’lum sababga ko‘ra, yo‘nalishdan chetga chiqib, sayozlikka tushgan.
Hodisa oqibatida hech kim jarohat olmagan. Voqeaning aniq sabablari hozircha noma’lum, Norvegiya politsiyasi tergov olib bormoqda.
Izoh (0)