Норвегия полицияси Латвия расмийларининг сўровига кўра, Болтиқ денгизидаги сувости алоқа кабелини бузганликда гумон қилиб, Россия экипажи билан Silver Dania кемасини қўлга олди.

Кема Тромсё портига етказилди, дея хабар берди полиция.

Ҳуқуқ-тартибот идоралари ходимлари Silver Dania бортида тинтув ўтказмоқда, шунингдек, далилларни тўплаш билан шуғулланмоқда. Санкт-Петербург ва Мурманск ўртасида ҳаракатланаётган кема Норвегияда рўйхатдан ўтган, унинг эгаси Норвегия юридик шахси ҳисобланади.

Silver Sea раҳбари ноқонуний фаолиятда алоқадорлигини рад этди

Silver Sea компанияси раҳбари ҳар қандай ноқонуний фаолият бўйича айбловларни рад этди.

Биз Готланд ёнидан сузиб ўтдик, лекин лангар ташламадик, дейди Тормод Фоссмарк.

Унинг сўзларига кўра, Норвегия ҳукумати кемани кабелнинг шикастланишига алоқадорлик бўйича шубҳаларни олиб ташлаш учун портга олиб келган.

Латвия ва Швеция ўртасидаги кабел шикастланиши

Жорий йилнинг 26 январь куни Болтиқ денгизида Латвиянинг Венцпилс шаҳри ва Швециянинг Готланд оролини боғлайдиган оптик толали кабел шикастланган. Латвия ҳарбийлари воқеа содир бўлган жой яқинида бўлган Michalis San кемасини текширган, аммо палубада шубҳали ҳаракатлар ёки лангар шикастланишини аниқламаган. Панама байроғи остидаги кема Россияга йўл олган эди.

Швеция прокуратураси, ўз навбатида, “кенг кўламли диверсия” факти бўйича тергов бошлаган ва воқеага алоқадорликда гумон қилинган Vezhen кемасини ҳибсга олган. Vesselfinder манбасига кўра, ушбу кема бир неча кун олдин Россиянинг Уст-Луга портидан чиқиб кетган ва Готланд ҳамда Латвия ўртасидаги ҳудудда бўлган вақтида алоқа кабели шикастлангани тахмин қилинмоқда.

Сўнгги ойларда Болтиқ денгизида муҳим телекоммуникация ва энергетика кабелларига бир неча бор шикаст етди. Бир қатор экспертлар ва сиёсатчилар буни Россия топшириғи билан уюштирилган ва Россиянинг “хуфиёна флоти” ёрдамида амалга оширилган ҳужумлар деб ҳисобламоқда.

АҚШ ва Европа иттифоқи разведка хизматлари можаролар Россия томонидан қўпорувчиликнинг натижаси эмас, балки тасодиф эканлиги ҳақида хулосага келди, деб хабар берди The Washington Post аноним суҳбатдошларига таяниб.