2025 йилнинг 1 март куни Тошкент шаҳрининг Мирзо Улуғбек туманида портлатилган хонадон сабаб кўп қаватли уйда яшовчи аҳоли вакиллари уйсиз қолди. Тошкент шаҳри ҳокими ҳамда Мирзо Улуғбек тумани раҳбари жабрланган аҳоли вакиллари билан кўришиб, улар 10 кунда уйли бўлишини, муаммо ҳал этилишини ваъда қилишганди. Бироқ ваъда ваъдалигича қолмоқда. Одамлар эса саросимага тушган.
Қирқ йилдан бери Қорасув-4 даги хонадонда яшардим. Шу йиллар давомида қўни-қўшнилар билан тинчгина яшаганмиз. 2025 йил 1 март куни қўшнимиз бизга маълум бўлмаган сабабларга кўра уйини портлатди. Ўзи ҳам портлади. Бунинг оқибатида 6 та хонадон жуда катта зарар кўрди. Уйларимиз яшашга нолойиқ деб топилиб, ҳокимият томонидан бузиб ташланди. Ҳозирги пайтда еттинчи қаватгача бўлган хонадонлар қолди. Биз ўша куни жароҳат олиб, шифохонага ётқизилдик. Лекин қолганларнинг гапиришига қараганда, шаҳар ҳокими ва Мирзо Улуғбек тумани ҳокими келишган. 10 кун ичида ҳамма уйларни таъмирлаб, ҳамма шарт-шароитларни яратамиз, деб ваъда беришган. Шундан сўнг 17 та хонадон эгалари меҳмонхонага кўчирилдик. Икки ой ўтганидан кейин қолган қўшниларимиз уйларини қисман таъмирлаб, ўз хонадонларига кириб яшашмоқда. Аммо қолган олтита хонадон эгалари ҳозир ҳам меҳмонхонада яшаяпмиз. Раҳмат давлатимизга, овқатимиздан хабар олиб турибди. Лекин уй-жой масаласи ҳали ҳам номаълум. Қачон бизга уй қилиб беришади?, дейди Дилфуза Нуралиева.
“Дом”даги хонадонини портлатган фуқаро буни ошхонадаги газ плитасини ёқиш орқали амалга оширган. Натижада газ ҳаво аралашмаси чақнаши содир бўлиб, ёнғин келиб чиққан. Шундан сўнг ҳам ниятига етмаган фуқаро тўққизинчи қаватдан ўзини ташлаш орқали жонига қасд қилган.
Ҳодиса содир бўлган кўп қаватли уйда қўшни хонадонлар ҳам зарар кўрган. Мирзо Улуғбек тумани ҳокими Баҳодир Ғойибназаров жабрланганлар билан учрашиб, улар ўз ҳолига ташлаб қўйилмаслигини, 10 кун муддат ичида таъмирталаб хонадонлар таъмирланишини, яшашга яроқсиз бўлиб қолган 6 та хонадон эгасига бошқа хонадонлар олиб берилишини ваъда қилган. Аммо орадан уч ой вақт ўца-да, ҳоким айтган “10 кун ичида ҳаммаси ҳал бўлиши” шунчаки гаплигича қолмоқда.
Мен Мирзо Улуғбек туманининг Қорасув-4 мавзесидаги кўп қаватли уйда яшаганман. 1 март куни бизда нохуш ҳодиса рўй берди. Қўшнимиз уйини портлатиб юборгандан кейин 8-, 9-қаватдаги хонадонлар ҳокимият томонидан бузиб ташланди. Ўша воқеа ўтганидан кейин 3 март куни Мирзо Улуғбек ҳокими келиб, мажлис ўтказди. Қорасувда икки хонали уй нархи қанча бўлса, ўша миқдорда компенсация ажратамиз, деб ваъда беришди. Бир ҳафта, узоғи билан ўн кун ичида муаммони ҳал қиламиз, дейишди. Фақат сизларга олиб бериладиган уйлар ҳар хил жойлардан бўлади, уй қидиринглар, дейишди. Топдик. Уй топганимизни айтдик ҳам. Аммо пул масаласи ҳалигача ҳал бўлмади. Ҳоким фақат берамиз дейди. Натижа йўқ, дейди Шаҳноза Алланазарова.
Яна бир фуқаро Хайрулла Нуралиев ўша кунги воқеа гувоҳи бўлганини айтмоқда.
Ўша куни соат 15:30 лар эди. Пастда шовқин эшитдим. Чиқсам “участковой” ва ФВВ ходими турибди. Уч киши темир эшикни очишга ҳаракат қилаётганини кўрдим. Мен “участковой”ни чақирдим, Андрей деган қўшним уйини қулфлаб олган экан. Қўшнимни чақириб, “чиқ, гапим бор”, дедим. Сенда гапим йўқ, деди менга. Шу пайтда эшик орасидан газнинг ҳиди келаётганини сездим. “Участковой”га “газ чиқяпти, бошқа чорасини кўринглар”, дедим. Шундан кейин улар темир эшикни тешиб очишди. Лекин ичкарида иккинчи қават эшиги бор эди. Иккинчи қават эшигининг иккита қулфи борлиги учун уни очолмадик. Кейин ФВВ ходими эшикни тепишни бошлади. “Тўхтанг, тепманг” дедим. Қўшним эшигини михлай бошлади. “Балкондан тушинглар, ойнаси йўқ”, дедим. Ўша пайт газ портлади. Мен зинадан думалаб кетдим. МЧС ходимининг юзи куйди. Менимча кўзи кўр бўлиб қолди. Операция бўлди деб эшитдим. “Участковой”нинг юзи куйиб кетди. Мана, ўша воқеадан кейин уч ойга яқин муддат ўтди. Ҳеч қандай янгилик йўқ. Фақат ваъда беришади, уй беришмаяпти, дейди Хайрулла Нуралиев.
“Дарё” аҳоли вакилларининг эътирозидан келиб чиқиб, Мирзо Улуғбек тумани ҳокимлиги ахборот хизмати раҳбари билан боғланиб, одамларни қийнаётган саволларга жавоб топишга уринди. Ҳокимлик ахборот хизмати масъули Маъмур Пармонов журналистни қизиқтираётган саволларга тез орада жавоб беришини айтса-да, жавоб бериш муддати келганда шунчаки сукут сақлашни лозим топди.
Туман ҳокимлиги ахборот хизмати раҳбари очиқ қолдирган саволларга жавоб беришга уринган Тошкент шаҳар ҳокимлиги ахборот хизмати раҳбари Гулноза Қосимова аҳолига уй сотиб олиш учун мўлжалланган маблағ Тошкент шаҳар ҳокимлиги томонидан молиялаштирилишини, молиялаштириш ишлари бошланганини, маблағ бўлишини кутишаётганини айтди.
Кеча қурилиш бўлими билан гаплашгандим, тез кунда бўлиб қолади, дейишди. Ҳужжатлар тайёр. Аниғини биз ҳам билмаймиз, пул кутяпмиз, дейишди. Лекин бу ерда кимдир ишни чўзганидан ёки лоқайдлигидан эмас, айнан шу маблағ тушиши кераклиги сабаб чўзилмоқда. Тез орада бўлади, дейишди, дейди ҳокимлик ахборот хизмати раҳбари.
Изоҳ (0)