Шу йил 3 октябрь куни фуқаро А.С. Ички ишлар вазирлигига тамагирлик ҳолати юзасидан ариза билан мурожаат қилди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Аризада ўзини Тошкент вилояти ҳокимлиги молия бош бошқармаси бошлиғининг ўринбосари деб таништирган шахс тадбиркорлик фаолиятини йўлга қўйиш учун Бўстонлиқ туманидаги туризм учун ажратилган заҳира ерлардан 3 гектар ер майдони олиб беришни ваъда қилиб, эвазига олдиндан 5000 АҚШ доллари беришни талаб қилаётганлиги билдирилган.
Шу куни вазирликнинг тезкор ходимлари томонидан ўтказилган тадбир давомида Тошкент вилояти ҳокимлиги Молия бош бошқармаси бошлиғининг биринчи ўринбосари лавозимида ишловчи Ж.Н. Тошкент шаҳри, Мирзо Улуғбек туманидаги Паркент кўчасида ариза муаллифидан 5000 АҚШ доллари миқдоридаги пулларни олган вақтида ашёвий далил билан ушланди.
Ушбу ҳолат юзасидан ИИВ ҳузуридаги Тергов департаменти томонидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)