Ёпиқ ҳужжатлар чиндан ҳам ёпиқми? Пойтахт ҳокимликлари нега қарор ва фармойишларни яширмоқда?

Тошкент шаҳар ҳокимликлари томонидан жойлаштирилган ҳужжатларнинг ҳар иккитасидан биттаси “шахсга оид” деган важ билан яшириб қўймоқда. Беркитилган ҳужжатларнинг аксарияти молиявий характерга эга.

“Дарё” ўтган йилнинг декабрь ойида пойтахт ҳокимликлари томонидан “E-qaror” ягона электрон тизимига жойлаштирилган ҳужжатлар бўйича таҳлилни ўтказди.

Йилнинг сўнгги ойида қанча ҳужжат жойлаштирилган

Тошкент шаҳри ва туманлари ҳокимликлари томонидан 2024 йилнинг 1 декабрдан 30 декабрь кунига қадар “E-qaror” платформаси орқали жами 744 та ҳужжат қабул қилинган. Шундан 31 таси норматив тусдаги қарорлар. Ҳужжатларнинг ярмидан кўпи турли важлар билан яшириб қўйилган.

Қабул қилинган ҳужжатларнинг 547 таси ҳоким қарори (72 фоиз) 197 таси фармойиш (28 фоиз) ҳисобланади. Шундан 469 таси, яъни 63 фоизи мазмунида шахсга доир маълумотлар, васийлик ва ҳомийлик ёки амалдаги қонунчиликка мувофиқ бошқа турдаги фойдаланиши чекланган ахборот мавжудлиги важи билан яшириб қўйилган. 

Тошкент шаҳри ҳокимлиги нечта ҳужжатни яширган 

Декабрь ойи давомида Тошкент шаҳри ҳокими Шавкат Умрзоқов томонидан жами 118 ҳужжат, шундан 85 таси қарор, 33 таси фармойиш имзоланган. Эътиборлиси, ҳужжатларнинг 82 таси (70 фоизи) мазмунида шахсга доир маълумотлар, васийлик ва ҳомийлик ёки амалдаги қонунчиликка мувофиқ бошқа турдаги фойдаланиши чекланган ахборот мавжудлиги важи билан яшириб қўйилган. Оммадан яширилган ҳужжатларнинг 62 тасига “Хизмат доирасида фойдаланиш учун” белгиси қўйилгани эса жуда қизиқ.

Яширишга уста ҳуқуқшунос ҳокимлар

“E-qaror” платформасида ҳужжатларни яшириш бўйича Чилонзор тумани ҳокимлиги етакчилигини бермаган. Декабрь ойида ҳокимлик томонидан жами 66 ҳужжат, шундан 47 таси қарор ва 19 таси фармойиш жойлаштирилган. Ҳужжатларнинг 53 таси, яъни 80 фоизи яшириб қўйилган. 

2021 йилдан буён Юнусобод туманига ҳокимлик қилиб келаётган Тошкент шаҳрининг прокурори собиқ ўринбосари Баҳодир Абдувалиев эса йилнинг сўнгги ойида имзолаган 52 та ҳужжатининг 37 тасини бошқалар кўролмаслиги учун “беркитиб” қўйган.

“Кучли учлик”дан 65 фоизлик “натижа” билан Олмазор тумани ҳокимлиги жой олган. Ушбу натижага узоқ йиллар ички ишлар тизимида ишлаб, ҳозирда туманга раҳбарлик қилаётган Азизхон Умархонов 69 та ҳужжатдан 44 тасини беркитиш орқали “эришган”.

Миробод (45 та ҳужжатдан 28 таси), Шайхонтоҳур (43 та ҳужжатдан 26), Янги ҳаёт (45 та ҳужжатдан 27 таси), Бектемир (47 та ҳужжатдан 28 таси), Яшнобод (27 та ҳужжатдан 16 таси) ва Учтепа (51 та ҳужжатдан 30 таси) туманлари ҳокимлари томонидан жойлаштирилган қарор ва фармойишларнинг 60 фоизининг “юзига қизил парда” тортиб қўйилган.

Қайд этиш лозим, Янги ҳаёт тумани ҳокимлиги жойлаштирган фармойишларнинг 93 фоизини “ёпиқ” ҳолда кўриш мумкин.

Мавзуга доир: Адлия вазирлиги “E-qaror” тизимида айрим ҳужжатлар йўқолиб қолганига муносабат билдирди

Мирзо Улуғбек тумани ҳокимлиги эса 58 та ҳужжатнинг 32 тасини беркитиб қўйган. Бу жами ҳужжатнинг 55 фоизини ташкил этади.

Пойтахт ҳокимликлари орасида Сергели тумани ҳокимлигини бошқаларга нисбатан энг очиқ ҳокимлик дейиш мумкин. Ушбу ҳокимлик томонидан имзоланган 52 та ҳужжатнинг тенг ярми беркитилган. Бу бошқа ҳудудларга нисбатан олганда анча яхши натижа.

“ХДФУ” қўйиш бўйича “чемпион”

Пойтахтнинг ягона аёл ҳокими Нилуфар Аллабергенова бошқа ҳамкасбларига нисбатан бир оз очиқ фаолият юритишини кўрсатган. Бироқ асли касби ҳуқуқшунос бўлган ҳоким ҳужжатларга “хизмат доирасида фойдаланиш учун” белгисини қўйиш бўйича етакчилик қилган. Декабрь ойида у томонидан 71 та ҳужжат (63 та қарор, 8 та фармойиш) имзоланган. Қарор ва фармойишларнинг 57 фоизи яширилган, шундан 37 тасига “ХДФУ” белгиси қўйилган.

Беркитилаётган ҳужжатларнинг аксарияти молиявий характерга эга

Яширилган қарор ва фармойишларнинг аксарияти молиявий характерга эга. Шу сабабли оммадан яширилаётган бўлиши мумкин.

Масалан, Юнусобод тумани ҳокимининг 2024 йил 24 декабрдаги 309-14-206-Қ/24– сонли қарори платформада беркитиб қўйилган. 

Қарорда туман маҳаллий бюджетининг 2024 йилда шаклланган қўшимча манбалари ҳисобидан туман ҳокимлиги ва таркибий бўлимлари, туман иқтисодиёт ва молия бўлими, ғазначилик хизмати бўлими раҳбар ва ходимларини бир ойлик лавозим иш ҳақи миқдорида мукофотлаш белгиланган.

Ҳужжат мазмуни ва иловасида шахсга доир маълумотлар мавжуд эмас. Бундан ташқари асоссиз равишда “ХДФУ” белгиси босилган. 

Шу сабабли ҳам туман адлия бўлими томонидан ўтказилган мониторинг давомида қарор очиб қўйилган бўлиши мумкин.

Мавзуга доир: Қарорларнинг ҳар учтадан биттаси ёпиқ ҳолда. “E-qaror” платформаси нега бундай йўл тутмоқда?

“Ёпиқлик” орқали қонунбузилишларга йўл қўйилмоқда

Ҳокимликлар ҳужжатларни беркитиш орқали нафақат ўз қилмишларини жамоатчиликдан яширяпти, балки шу орқали “Бюджет кодекси”, “Норматив-ҳуқуқий ҳужжатлар тўғрисида”, “Давлат ҳокимияти ва бошқаруви органлари фаолиятининг очиқлиги тўғрисида”ги ва бошқа бир қатор қонун ҳамда қонуности ҳужжатларнинг талаблари бузилишига йўл қўймоқда.

Афсуски, бу каби яширилган шубҳали қарор ва фармойишлар бошқа ҳудудларда ҳам йўқ эмас.

“Дарё” “E-qaror” платформасига жойлаштирилган ҳужжатларнинг кузатишда давом этади.