Universal Mobile Systemс мобил алоқа операторини (Mobiuz) хусусийлаштириш жараёнида 15 та халқаро ва маҳаллий компаниялар қатнашмоқда. Бу ҳақда Давлат активларини бошқариш агентлиги матбуот хизмати хабар берди.
Компания устав капиталидаги 100 фоиз давлат улушини хусусийлаштириш бўйича халқаро очиқ савдо 9 июнь куни бошланганди. 2025 йил 1 августга келиб бу борада АҚШ, Европа, Араб давлатлари, Яқин Шарқ, Кавказорти, Шарқий ва Марказий Осиё минтақаларидан 15 та хорижий ва маҳаллий компаниялардан қизиқиш билдириш тўғрисидаги аризалари (EoI) келиб тушган.
Компаниялар қуйидаги мезонлар асосида таҳлил этилди:
- молиявий имкониятларнинг етарлилиги;
- ҳуқуқий тўсиқлар мавжуд эмаслиги;
- жиноий даромадлар ва терроризмни молиялаштиришга қарши қонунчиликка риоя қилиш ҳолати;
- Европа иттифоқи, АҚШ ва халқаро молия институтлари санкциялари рўйхатларига киритилмагани;
- давлат компанияси мақомига эга эмаслиги.
Таҳлил натижасига кўра, консултантлар томонидан барча талабгорларни Мажбуриятга эга бўлмаган таклифлар (NBО) ни тақдим этиш босқичига ўтказиш тавсия этилди.
Ушбу босқичда қуйидаги ишлар амалга оширилади:
- талабгорлар билан ахборотни ошкор этмаслик тўғрисидаги битимлар (NDА) имзолаш;
- консултантлар тайёрлаган МобиУз фаолияти ҳақидаги умумий ва таҳлилий маълумотларни ўз ичига олган ахборот жамланмаси (Information Memorandum), шунингдек, менежмент томонидан тасдиқланган ва мустақил консултант томонидан маъқулланган асосларга эга молия модели (Financial Моdel) сақланадиган виртуал маълумотлар хонасига (VDR) кириш имкониятини яратиш;
- талабгорлар томонидан зарур таҳлиллар ва MobiUzни фаолиятини ўрганиш имкониятларини яратиш.
Консултантлар томонидан Мажбуриятга эга бўлмаган таклифлар (NBО) 2025 йил 15-октябрь соат 23:59 (Тошкент вақти)га қадар қабул қилинади.
Mobiuz хусусийлаштирилиши ҳақида
Компания 2014 йилда Россиянинг МТС ва Ўзбекистон давлат радиоалоқа, радиоэшиттириш ва телевидение маркази ўртасидаги қўшма корхона сифатида ташкил этилган. Операторнинг ташкил этилиши 2012 йилда МТСнинг шўба корхонаси “Ўздунробита” лицензияси бекор қилинганидан кейинги келишувларнинг бир қисми бўлган. 2019 йилдан бошлаб Mobiuz тўлиқ давлат назоратига ўтган.
2020 йилда Mobiuz’ни хусусийлаштиришга тайёрлаш режалари эълон қилинди. Орадан бир йил ўтиб, Mobiuzъни 2023 йилнинг апрелигача хусусийлаштириш режалаштирилганди. Ушбу компаниядаги давлат улушини сотиш вазифаси президентнинг 2025 йил 21 апрелдаги қарорида ҳам белгиланган.
Fitch Solutions/BMI маълумотларига асосан, 2024 йил охирида Mobiuz’нинг улуши умумий мобил фойдаланувчилар сонининг 20,9 фоизини, яъни мамлакатдаги 35,6 миллион абонентнинг тахминан 7,4 миллионни ташкил этган.
Bloomberg нашрининг битим тафсилотлари билан таниш бўлган икки хабардор манбасига таяниб ёзишича, Ўзбекистон мобил алоқа операторини 300 млн долларга сотишни режалаштирмоқда.
Изоҳ (0)