Тошкент шаҳар Мирзо Улуғбек туманида кўп қаватли уйларнинг биридаги хонадонда чақнаш содир бўлгани хабар қилинганди. Пойтахт ҳокимлиги ҳолат бўйича тезкор штаб ташкил этилганини маълум қилди.
Айтилишича, ҳодиса содир бўлган кўп қаватли уйда қўшни хонадонлар ҳам зарар кўргани аниқланди. Ҳозирда шаҳар ва Мирзо Улуғбек тумани ҳокимликлари томонидан уларнинг хавфсизлиги ва қулай шароитларини таъминлаш мақсадида оила аъзолари билан бирга меҳмонхонага вақтинча жойлаштириш чоралари кўрилмоқда.
Шунингдек, улар иссиқ овқат билан таъминланди. Мутасадди ташкилотлар томонидан зарарни баҳолаш ва бартараф этиш ишлари давом этмоқда.
Воқеа ҳақида батафсил
1 март куни соат 15:23 да Тошкент шаҳар ФВБга Мирзо Улуғбек тумани, Қорасув-4 мавзесида жойлашган кўп қаватли уйларнинг биридаги хонадонда чақнаш содир бўлгани тўғрисида хабар тушган. Айтилган манзилга ёнғин-қутқарув экипажлари етиб борган. Воқеа жойига ФВБ, ИИББ, ССБ, прокуратура ва бошқа тегишли ташкилотлар ходимлари етиб борган.
Ёнғин-қутқарув экипажлари соат 15:29 да етиб борганида 9 қаватли уйнинг 9-қаватидаги хонадонда чақнаш натижасида ёнғин содир бўлгани аниқланган. Ёнғин соат 16:07 да ўчирилган.
Манзилда 6 нафар фуқаро қутқарилиб тез тиббий ёрдам хизматига топшилган, ҳалок бўлганлар тўғрисида ҳозирда маълумот келиб тушмади.
Мазкур ҳолат юзасидан бирламчи маълумотларга қараганда, ёнғин содир бўлган хонадонда фуқаро ошхонада газ плитасини ёқиш орқали ўз жонига қасд қилишга уринган. Натижада газ ҳаво аралашмаси чақнаши содир бўлиб ёнғин келиб чиққандан сўнг ушбу фуқаро 9-қаватдан ўзини ташлаш орқали ҳалок бўлгани аниқланди.
Бундан аввал Тошкент шаҳрининг Яшнобод тумани, “Дўстобод” МФЙ, Махтумқули кўчасидаги кўп қаватли уйларнинг бирдаги хонадон ошхонасида газ-ҳаво аралашмасининг чақнаш содир бўлганди. Чақнаш оқибатида 1 нафар фуқаро куйиш тан жароҳати олиб, шифохонага юборилган.
20 ноябрь куни Тошкент шаҳар Мирзо Улуғбек тумани, “Лашкарбоши” МФЙ Ниёзбек йўли кўчасида жойлашган умумий овқатланиш жойининг дудбуронида ёнғин содир бўлди.
31 декабрь куни Чилонзор туманидаги овқат тайёрлаш жойида ёнғин содир бўлган эди.
2025 йил 25 февраль куни Тошкент шаҳрининг Яшнобод тумани, Авиасозлар 4-даҳасида жойлашган автомобиллар ювиш жойида ёнғин содир бўлганди.
Изоҳ (0)