Халқ депутатлари Тошкент шаҳри кенгаши 29 ноябрь куни гул кўчатлари харид қилишни молиялаштириш тўғрисида қарор қабул қилди.
19 сентябрь куни депутатлар томонидан 2023 йилда пойтахтда мавсумий гуллар экиш билан боғлиқ харажатлар учун 6,2 миллиард сўм, гул кўчатлари экиш учун туман ободонлаштириш бўлимларига яна 5,8 миллиард сўм миқдорида (жами 12 миллиард сўм) маблағ ажратилиши маъқулланган.
Сентябрдаги қарор ижросини таъминлаш мақсадида Ободонлаштириш бош бошқармасининг ихтисослаштирилган бўлинмалари ва туман бўлимларига гул кўчатлари харид қилиш билан боғлиқ харажатлар учун 5 миллиард сўм маблағ ажратилган. Бу маҳаллий бюджет ҳисобидан молиялаштирилиб, 2023 йилнинг учинчи чорагида республика бюджети даромадларининг ортиғи билан бажарилган қисмидан қопланади.
Ободонлаштириш бош бошқармасининг 12 та туман бўлими учун 2,73 миллиард сўм ажратилган: энг катта маблағ Мирзо Улуғбек (500 миллион сўм) ва Чилонзор туманларига (400 миллион сўм), энг ками Бектемир (100 миллион сўм) ва Янгиҳаёт (130 миллион сўм) туманларига ажратилди.
Аввалроқ шаҳар кенгаши томонидан 12 миллиард сўм ажратилиши тасдиқланган. Энди пул зарурат туғилганда ажратилади. Ҳозир 5 миллиард сўм ажратилган. Шундан сўнг ушбу маблағни тақсимлаш тўғрисида ҳокимнинг қарори бўлиши керак ва шундан кейингина маблағ ажратилади. Бунда ҳоким биринчи навбатда 1 миллиард сўм, кейин эса 3 миллиард сўм ва ҳоказолар ажратиш тўғрисида қарор қабул қилиши мумкин, — дея изоҳ берган Тошкент ҳокимлиги матбуот хизмати “Газета.уз” нашрига.
Июль ўрталарида Тошкент шаҳрининг маҳаллий бюджетидан “Пахтакор” футбол клуби ҳисобига 7 миллиард сўм маблағ ўтказиб берилиши айтилган эди.
Изоҳ (0)