Тошкентдаги «Оқибат» маҳалласини қийнаган муаммо шаҳар ҳокимининг аралашуви билан ҳал этилди

14 апрель куни Тошкент шаҳри Мирзо Улуғбек тумани «Оқибат» маҳалласи аҳолисини бир неча ойдан бери қийнаётган муаммо ҳал этилди, деб хабар беради «Газета.uz».

Гап шундаки, 2017 йилнинг 30 июнида туман ҳокимлиги томонидан «Замонавий маҳалла» дастури доирасида Big Build Group МЧЖга маҳалладаги умумий ҳовлидан 12 сотих ер ажратилган эди.

Ушбу ер майдони барча томондан ўраб олиниб, тез орада қурилиш ишлари бошланиб кетди. Бироқ, маҳаллий аҳоли вакиллари бу ерда нима қурилаётганидан бехабар эди. Фуқаролар турли ташкилотларга шикоят аризалари билан мурожаат қилганидан сўнг «сир» очилди.

Маълум бўлишича, бу ерда бир қисми маҳалла гузарига ажратиладиган савдо-маиший мажмуа барпо этилаётган экан. Турли йўналишдаги ташкилотлар маҳалла фуқароларининг шикоят аризаларини узоқ ўрганди ҳамда 14 апрель куни шаҳар прокуратураси бошчилигидаги махсус комиссия «Оқибат» маҳалласида яшовчи фуқаролар билан учрашди. Комиссия таркибида объект қурилишига рухсат берган ташкилотларнинг мансабдор шахслари ҳам киритилди.

Комиссиянинг фуқаролар билан учрашувида «Оқибат» маҳалла фуқаролар йиғини раиси М.Йўлдошева туман ҳокимлигига ёлғон маълумот бергани аниқланди. М.Йўлдошева туман ҳокимлигига ёзган хатида фуқаролар иштирокида ўтказилган кенгайтирилган мажлисда улар маҳалла ҳудудидан Big Build Group МЧЖга қурилиш учун ер ажратилишини маъқуллаганини маълум қилган. Аслида эса маҳалла аҳолисининг қурилишдан умуман хабари бўлмаган ва ер майдони ажратилишига маҳаллада яшовчилардан ҳеч ким розилик бермаган.

Шу пайти маҳаллага Тошкент шаҳар ҳокими Раҳмонбек Усмонов ташриф буюрди ва фуқаролар билан суҳбатлашди. Ҳоким шаҳарда «Замонавий маҳалла» дастури қабул қилинган бўлиб, унга кўра пойтахтдаги 505 та маҳалланинг барчасида янги маҳалла марказлари қурилиши кўзда тутилганини таъкидлади.

Фуқаролар маҳаллада бир нечта дўконлар, кутубхона мавжудлигини, бироқ қурилиш туфайли болалар ва спорт майдончалари йўқолиб қолганини айтди. Тўрт қаватли уй баландлигида қурилаётган икки қаватли бино шаҳарсозлик нормаларига зид эканлигини, қурилиш турли салбий оқибатларни келтириб чиқариши мумкинлиги маълум қилинди.

Одамларни тинглаган Раҳмонбек Усмонов қурилишни тўхтатиш ва аввалги маҳалла гузари ҳамда унинг атрофидаги инфратузилмани қайта тиклаш ҳақида қарор қабул қилди.

Шунингдек, Раҳмонбек Усмонов «Оқибат» маҳалла фуқаролар йиғини раиси М.Йўлдошевани ўз лавозимидан озод қилди ва фуқароларга 15 кун ичида бўшаб қолган маҳалла оқсоқоли лавозимига муносиб номзодни таклиф этишни топширди.

«Ҳокимнинг сўзларини эшитган фуқаролар қарсак чалиб юборди, кўпчиликнинг кўзларига ёш қалқди. Бу эса қувонч кўз ёшлари эди», — дейилади хабарда.