Тошкент шаҳри Мирзо Улуғбек туманида 32 ёшли аёл лифтда қамалиб, вафот этгани хабар қилинганди. “Дарё” мухбири ҳолат юз берган кўп қаватли уйга бориб, репортаж тайёрлади.
Ижтимоий тармоқларда тарқалган хабарларда одам ўлими билан якунланган ушбу кўнгилсизликка электр энергияси таъминотидаги доимий узилишлар сабаб қилиб кўрсатилганди. Ҳудудда хизмат олиб бораётган масъулларнинг айтишича эса, марҳума лифтга қамалиб қолган 23—24 июль кунлари кўп қаватли уйда чироқ ўчмаган.
“Ўрганишлар давомида маълум бўлдики, айнан ўша кунларда электр энергиясида узилишлар бўлмаган. Буни диспетчерлик хизматининг авариявий ўчишларни қайд этиш журналида ҳам кўриш мумкин. Ҳолатга сабаб бўлган нарса эса лифтдаги носозлик. Аҳоли ҳам буни тасдиқлаб турибди”, — дейди “Ҳудудий электр тармоқлари” АЖ ахборот хизмати раҳбар Фахриддин Нуралиев.
Унинг айтишича, хонадонлар янги бўлгани боис лифтларга хизмат кўрсатувчи ширкатлар ҳали тузилмаган.
“Аёл бу турар жойда яшамаган, у Яшнобод туманида истиқомат қилган. Марҳума почта таъминотида фаолият олиб борган, 24 июль санасида хизмат юзасидан ушбу уйга келган”, — деди Мирзо Улуғбек тумани ҳокимлиги матбуот хизмати раҳбари Маъмур Пармонов.
Шу ердаги аҳоли ҳамда масъулларнинг қўшимча қилишича, аёл хизмат юзасидан лифт орқали 8-қаватга кўтарилиш чоғида носозлик юзага келган. Марҳума тахминан 4 кун давомида лифт ичида қамалиб қолган. 27 июль куни эса унинг жасади топилган.
Изоҳ (0)