Тошкент шаҳар ҳокими Шавкат Умрзоқов 2024 йилнинг 10 октябрь куни 709-14-0-Қ/24 сонли қарорни қабул қилиб, яшириб қўйган. Яширилган ҳужжатга “ушбу ҳужжат шахсга доир маълумотлар, васийлик ва ҳомийлик ёки амалдаги қонунчиликка мувофиқ бошқа турдаги фойдаланиши чекланган ахборот мавжудлиги туфайли яширинган”лиги ҳақида изоҳ ёзилган. Бу эса қонунчиликка зид ҳисобланади.
Боиси қарор “Маблағ ажратиш тўғрисида” бўлиб, ушбу ҳужжат билан республика бюджетидан иссиқлик энергияси ва иссиқ сув таъминоти харажатлари учун Тошкент шаҳар маҳаллий бюджетига ажратилган 100 миллиард сўм мавжуд қарздорликлар ва кутилаётган харажатларни қоплаш назарда тутилган.
Бунинг учун Вазирлар Маҳкамасининг 2021 йил 22 сентябрдаги Тошкент шаҳри иссиқлик таъминоти тизимини давлат-хусусий шериклик асосида ривожлантириш тўғрисидаги қарори асос қилиб кўрсатилган. Қарорнинг 7-бандида Молия вазирлиги Тошкент шаҳар ҳокимлиги томонидан тақдим қилинадиган ҳисоб-китоблар асосида ҳар йили Тошкент шаҳар маҳаллий бюджети параметрларини шакллантиришда аҳолига иссиқлик энергияси ва иссиқ сувга пасайтирилган тарифларни қўллаш натижасида юзага келадиган зарарларни қоплаш учун зарур субсидия маблағлари назарда тутилган.
Қарор ижросини таъминлаш мақсадида октябрь ойида Яккасарой, Шайхонтоҳур, Сирғали, Учтепа, Мирзо Улуғбек, Янги ҳаёт, Бектемир, Чилонзор, Юнусобод туманлари ҳокимларининг қарорлари қабул қилинган. Қарорларда:
- Яккасарой туманига — 4 миллиард,
- Шайхонтоҳур туманига —7 миллиард,
- Сирғали туманига салкам — 3 миллиард,
- Учтепа туманига — 8 миллиард,
- Мирзо Улуғбек туманига — 14 миллиард,
- Янги ҳаёт туманига — 3,5 миллиард,
- Бектемир туманига — 2 миллиард,
- Чилонзор туманига — 8 миллиард,
- Юнусобод туманига — 7 миллиард сўмдан зиёд маблағ ажратилганини кўриш мумкин.
Яшнобод, Олмазор, Миробод туманлари ҳокимларининг қарорларини топишнинг иложи бўлмади. Катта эҳтимол билан ушбу туманлар ҳокимларининг қарорлари яшириб қўйилган.
Шайхонтоҳур тумани ҳокимлиги қарорга асоссиз равишда ХДФУ (хизмат доирасида фойдаланиш учун) белгисини қўйган. Бундан кўриниб турибдики, қарор ҳокимлик томонидан дастлаб яшириб қўйилган. Бироқ адлия бўлими очиб қўйган бўлиши мумкин.
“Давлат ҳокимияти ва бошқаруви органлари фаолиятининг очиқлиги тўғрисида” қонунининг 5-моддасига кўра, бюджетдан ажратиладиган маблағлар, бюджет ташкилотларининг бюджетдан ташқари жамғармалари маблағларидан фойдаланилиши тўғрисида тегишли ахборот давлат ҳокимияти ва бошқаруви органларининг фаолияти тўғрисидаги ахборот жумласига кириши белгиланган.
Қонунчиликка мувофиқ Тошкент шаҳар ҳокимининг ушбу қарори бюджет тақсимотига доир бўлганлиги боис очиқ кўриниб туриши шарт.
Афсуски, қарор “шахсга оид” деган важ билан беркитиб қўйилган. Ҳоким нега харажатларни асоссиз яширмоқда?
Бундан ташқари, Вазирлар Маҳкамасининг 2021 йил 22 сентябрдаги 594-сонли қарорига мувофиқ аҳолига иссиқлик таъминоти хизматлари бўйича пасайтирилган тарифлар қўлланилиши натижасида юзага келадиган зарарлар маҳаллий бюджет ҳисобидан ҳар ойда субсидиялар ажратиш орқали халқ депутатлари Тошкент шаҳар Кенгаши қарорларига асосан қоплаб берилиши белгиланган.
Бундан кўриниб турибдики, маблағ ажратишга оид ушбу қарор ҳоким томонидан эмас, кенгаш томонидан қабул қилиниши лозим эди.
Маҳаллий давлат ҳокимиятлари фаолиятини назорат қилиб бориши лозим бўлган ҳудудий адлия органлари нега мунтазам равишда ўрганишлар олиб бормаяпти?
Ўрганиш олиб бораётган бўлса, нега ёпиқ жойлаштирилган қарор ва фармойишлар қонун талабига кўра очиб қўйилмаяпти?
“Дарё” мавзу юзасидан саволларга ҳокимлик ва адлия органларидан жавоб кутиб қолади.
Изоҳ (0)