Тошкент шаҳри Мирзо Улуғбек тумани Марказ-1 мавзесида ноқонуний қурилган тадбиркорлик объектлари бузилмоқда. Туман ҳокимлиги ҳолат юзасидан маълумот берди.
Таъкидланишича, мавзеда ҳукумат қарорига зид равишда тадбиркорлик субъектлари томонидан ноқонуний, қўшимча қурилмалар қуриб олинган. Тадбиркорлар бу пандемия шароитида яратилган енгиллик ва қулайлик эканини таъкидлаб, ҳудудни тартибга келтиришга қаршилик қилган. Ҳокимлик ҳар қандай фаолият қонун доирасида олиб борилиши шарт эканлиги ва бундай ҳолатлар тўлиқ бартараф этилишини маълум қилган.
Бундан ташқари, Мирзо Улуғбек ҳокимияти ҳудудда истиқомат қилаётган фуқароларнинг розилиги ҳам тадбиркорлик субъектларининг ноқонуний қурилишлари бузилишининг олдини олмаслигини билдирган. Марказ-1 мавзесида бузилаётган бинолар ичида машҳур “Чайкоф” қаҳвахонаси ҳам мавжуд. “Дарё” қаҳвахона тармоғи асосчиси Алина Зиммерман билан суҳбатлашиб, ҳолат юзасидан маълумот олди.
“Муаммони ҳал қилиш учун муддат берилмади. Улар ҳамма нарсани бузиш учун махсус жиҳозлар олиб келинишини айтди, биз буни ўзимиз эҳтиёткорлик билан амалга ошириш учун имкон беришни сўрадик”, — деб таъкидлайди тадбиркор. Аммо расмийлар томонидан юборилган гуруҳ қаҳвахона биносини бузишни бошлаган, ички ишлар ходимлари атрофда тўлиқ навбатчилик қилмоқда.
Изоҳ (0)