Бош вазир ва Тошкент шаҳар ҳокими биноларнинг 1-қаватидаги кафе ва дўконларни бузиш бўйича кўрсатма бергани рад этилди

Бош вазир ва Тошкент шаҳар ҳокими вазифасини бажарувчи Шавкат Умурзоқов  пойтахт марказида жойлашган биноларнинг 1-қаватидаги кафе ва дўконларни бузиш бўйича кўрсатма бергани рад этилди. 

Бош вазир матбуот котибининг маълум қилишича, 28 май куни бош вазири Абдулла Арипов Тошкент шаҳри ҳокими вазифасини бажарувчи Шавкат Умурзоқов билан пойтахт маркази – С1 ни кезгани, кўп қаватли турар жой биноларининг биринчи қаватларидаги кафе ва дўконларни бузиш бўйича кўрсатма бергани ёлғон бўлиб, ҳақиқатга мутлақо тўғри келмайди.

Бош вазир 28 май куни белгиланган режага асосан соат 10:00 дан 22:00 га қадар Самарқанд вилоятида бўлган. Мирзо Улуғбек тумани, Марказ – 1 даҳаси аҳолисининг мурожаати асосида вазиятни ўрганиш ва тегишли чораларни кўриш Тошкент шаҳар ҳокимлиги томонидан амалга оширилган. Мазкур жараёнда Вазирлар Маҳкамасининг бирорта мутасаддилари иштирок этмаган ва кўрсатма бермаган.

Ҳолат юзасидан шаҳар ҳокимлиги матбуот хизмати ҳам маълумот берди. Унга кўра, айни вақтда Тошкент шаҳар ҳокими в.б. Шавкат Умурзоқов ҳамда шаҳар ва туман секторларининг раҳбарлари туманларга чиқиб, сайёр қабул ўтказган ҳолда аҳоли мурожаатлари, муаммо ва таклифлари билан танишиб чиқмоқда. 

Шундай тадбирлардан бирида Марказ-1 даҳасида яшовчи фуқаролар ўзлари яшаб турган уйларнинг пастки қаватларида ташкил этилган объектларнинг фаолиятидан норозилигини билдириб, уларнинг шовқини, таомларнинг ҳиди, уларга қатнайдиган аҳолининг транспорт воситалари қатор ноқулайликларни келтириб чиқараётганидан арз қилган.

Ушбу мурожаатлар асосида вазият шаҳар ҳокимлиги ҳамда Қурилиш ва уй-жой коммунал хўжалиги соҳасида назорат инспекцияси томонидан ўрганилиб, тадбиркорлик субъектлари томонидан шаҳарсозлик нормаларининг қўпол бузилишига, ўзбошимчалик билан ноқонуний тарзда биноларнинг конструкцияларида ўзгартиришлар киритилгани ва шаҳарсозлик нормаларига зид равишда қурилишлар амалга оширилгани аниқланган.

Юқорида келтирилган манзилдаги объектларда ушбу нормаларнинг барчаси бузилган, шу сабабли мазкур объектлар шаҳарсозлик нормалари ва қоидаларига мувофиқлаштирилмоқда. Яъни, тадбиркорларга нисбатан ҳеч қандай ноқонуний хатти-ҳаракатлар, қилингани йўқ, балки, амалдаги қонунчилиги асосида тегишли чоралар кўрилмоқда.

Қайд этилишича, ушбу вазиятни ўрганиш ва тегишли чораларни кўриш Тошкент шаҳар ҳокимлиги томонидан амалга оширилган. Мазкур жараёнда Вазирлар Маҳкамасининг мутасаддилари иштирок этмаган ва кўрсатма бермаган.