Ҳиндистон 2040 йилгача Ойга ҳинд астронавтини қўндиришга қаратилган улкан космик дастурни ишга туширди.
Бу ҳақда Ҳиндистон космик тадқиқотлар ташкилоти раиси Шридхара Соманат маълум қилди.
"Мустақиллигимизнинг 100 йиллигини нишонлаганимизда, Ойда Ҳиндистон байроғи ҳилпирайди. Бизнинг одамимиз у ерга бориб, байроқни ўрнатиб, эсон-омон қайтади. Бу 2040 йилда содир бўлади", - деди у.
"Коинот дастури тарихида биринчи марта биз келгуси 25 йилга мўлжалланган аниқ режага эгамиз", деб қўшимча қилди Шридхара Соманат.
Унинг сўзларига кўра, ушбу йўл харитаси доирасида Ҳиндистон 10 йил ичида ўзининг космик станциясини яратишни режалаштирмоқда. Бунинг учун 2028 йилда космик станция модули ишга туширилади.
Аввалроқ Ҳиндистон бош вазири Нарендра Моди республиканинг Коинот тадқиқотлари департаменти олдига 2035 йилгача Ҳиндистоннинг биринчи бошқариладиган космик станциясини яратиш ва 2040 йилгача Ойга космонавтларни қўндириш вазифасини қўйган эди.
Моди шунингдек, мутахассисларни Венерага орбитал станция ва Марсга қўниш модулини учириш дастурларини ишлаб чиқишга чақирганди.
Изоҳ (0)