Олимлар илк бор Ой сатҳида ғор борлигини аниқлади. Бу ҳақда BBC нашри хабар берди.
Манбада айтилишича, аниқланган ғор Ой сатҳидан камида 100 метр чуқурликда жойлашган. Тадқиқотчилар бу каби ғорлар Ер йўлдошида кўплаб бўлиши мумкинлигини тахмин қилмоқда.
Мутахассисларнинг бир гуруҳи янги ғорни инсониятнинг келгусидаги коинот миссиялари учун база сифатида кўрмоқда. Чунки ғор астронавтларни космик радиация, экстремал ҳарорат ва космик булутлардан ҳимоя қила олади.
Ойдаги сирли объектни Италиянинг Тренто университети олимлари Лорензо Бруззоне ва Леонардо Каррерлар топган. Улар табиий йўлдошдаги Mare Tranquillitatis деб номланган қояли текислик ҳудудини кузатган ва космик радар ёрдамида шубҳали чуқурликни аниқлаган.
Ғор АҚШнинг Аполлон 11 миссияси қўнган ҳудуд яқинида жойлашган. Унинг ички қисми вулқон кули ва тошқотма маъдандан иборат экани тахмин қилинган.
“Бу ҳақиқатан ҳам ҳаяжонли. Ушбу кашфиётларни амалга оширганингизда ва тасвирларга қараганингизда, инсоният тарихида буни кўрган биринчи одам эканлигингизни тушунишингиз — бу жуда ажойиб ҳиссиёт”, дейди профессор Каррер.
Тадқиқотчилар инсоният кейинги 20-30 йиллар давомида Ойда топилган ғорлардан фойдаланиши мумкинлигини билдирган. Ғарб ҳукуматларида эса аллақачон космик станция қуриш режаси мавжуд.
Изоҳ (0)