Ҳиндистон қуёшни ўрганиш учун космик кема учиради

Ойдаги муваффақиятли миссиядан сўнг Ҳиндистон Қуёшга ўзининг биринчи космик кемасини жўнатмоқчи.

Ҳиндистон космик тадқиқотлар ташкилоти (ISRO) 2 сентябрь куни Адитя-Л1 автоматик станциясини ишга туширишга тайёрланаётганини маълум қилди.

“Космик кема Ердан тахминан 1,5 миллион км узоқликда жойлашган Қуёш-Ер тизимининг Лагранж 1 нуқтаси  (L1) атрофидаги гало орбитасига чиқарилади. L1 нуқтаси атрофидаги гало орбитада жойлашган сунъий йўлдош ҳеч қандай тўсиқларсиз Қуёшни доимий равишда кузатиш имкониятига эга бўлади. Бу реал вақт режимида қуёш фаоллигини ва унинг космик об-ҳавога таъсирини кузатишни таъминлайди”, — дейилади ташкилот баёнотида.

 

 

 

23 август куни Ҳиндистоннинг Чандраяан-3 станциясининг қўниш модули Ой юзасига муваффақиятли қўнди. Эртаси куни, 24 август куни станция бортига етказилган Прагян луноходи биринчи марта Ой юзасида саёҳат қилди. Ҳиндистон Ойнинг жанубий қутбига “юмшоқ қўниш”ни амалга оширган биринчи давлат бўлди. Шундан сўнг 23 август Ҳиндистонда “Миллий коинот” куни деб эълон қилинди.