11 март куни НАСАнинг янги SphereХ телескопи 6 ой давомида осмоннинг аниқроқ тасвирини яратиш учун космосга учирилди. У билан бирга Қуёшни ўрганиш учун тўртта сунъий йўлдош ҳам жўнатилди. Бу ҳақда Associated Press хабар берди.
488 миллион доллар қийматидаги SphereХ миссияси галактикаларнинг миллиардлаб йиллар давомида қандай шакллангани, шунингдек, коинот яратилгандан бери қандай тез кенгайганини тушунтиришга қаратилган.
Конуссимон SphereХ 1110 фунт (500 килограмм) оғирликда бўлиб, ўзининг инфрақизил окуляри орқали кенг кўриш майдонига эга. Телескоп Ер шарини қутбдан қутбгача 400 миля (650 километр) баландликда айланиб чиқиши, у орқали икки йил давомида тўртта тўлиқ фазовий тадқиқот ўтказилиши режалаштирилган.
SphereX’нинг бошқа телескоплардан фарқли жиҳати, у галактикаларни санаб чиқиш ўрнига улардан ажралиб чиқадиган умумий ёруғликни кузатади.
Бу космологик нурланиш коинот тарихи давомида тарқалган барча ёруғликни ўз ичига олади. Бу коинотни ўрганишнинг бутунлай бошқача усули бўлиб, олимларга илгари эътибордан четда қолган ёруғлик манбаларини кўриш имконини беради”, деди миссиянинг бош олими, Калифорния технология институтидан Жейми Бок.
Бокнинг айтишича, олимлар умумий нурланишни кузатиш орқали энг қадимги галактикалардан келаётган ёруғликни ажратиб олишга ва уларнинг қандай пайдо бўлганлигини тушунишга умид қилмоқдалар.
Биз коинот қандай ва қачон бошланганини кўра олмаймиз. Аммо ҳозирги тузилишини таҳлил қилиб, у ҳақида дастлабки маълумотларга эга бўлишимиз мумкин, деди у.
SphereX телескопнинг инфрақизил детекторлари инсон кўзига кўринмайдиган 102 рангни ажрата олади, бу эса коинотдан яратилган энг ранг-баранг, инклюзив харитани беради.
Бу “Камалак рангидаги кўзойнаклар тўплами орқали коинотга қараш”га ўхшайди, деди НАСА реактив двигателлар лабораторияси лойиҳа менежери ўринбосари Бет Фабински.
Телескопдан ташқари, SpaceX компанияси НАСАнинг Punch деб номланган тўртта сунъий йўлдошини космосга олиб чиқди. Сунъий йўлдошлар ўзларининг алоҳида қутбий орбиталаридан қуёш тожи ва ундан ҳосил бўладиган қуёш шамолини кузатиб борадилар.
Изоҳ (0)