Хитой Маскнинг Starlink сунъий йўлдошлари устидан БМТга шикоят қилди

Илон Маскнинг SpaceX компаниясига тегишли Starlink интернет сунъий йўлдошлари Хитойда танқидларга учради, деб ёзмоқда Reuters.

Хитой ҳукумати SpaceX томонидан учирилган Starlink сунъий йўлдошлари билан тўқнашувнинг олдини олиш учун Хитой космик станциясининг траекториясини ўзгартиришга мажбур бўлганидан сўнг Бирлашган Миллатлар Ташкилотининг коинот масалалари бўйича бошқармасига шикоят билан мурожаат қилган.

Хабарга кўра, шикоят кўриб чиқиш босқичида. Пекин баёнотига кўра, космик станция Starlink сунъий йўлдошлари билан камида икки марта «тўқнашиб кетай деган». Ҳодисалар 1 июль ва 21 октябрь кунлари содир бўлган. Хитой ўз мурожаатида Коинот шартномасининг барча иштирокчиларига давлат ва нодавлат ташкилотларининг коинотдаги фаолияти учун халқаро масъулиятларини зиммасига олиши кераклигини эслатишни сўраган.

Шикоятни топширгандан сўнг, Хитойнинг Twitter’га ўхшаш Weibo микроблоглар сервиси фойдаланувчиларидан айримлари Starlink сунъий йўлдошларини «бир уюм космик чиқиндилар» деб атаган бўлса, бошқалари «Америка космик қуроли» деб таърифлаган.

«Starlink’нинг хавфли жиҳатлари аста-секин ошкор бўлмоқда, бутун инсоният ўз иш фаолияти учун ҳақ тўлайди», — деб ёзди Weibo фойдаланувчи Чен Хайин.

Маълум қилинишича, SpaceX аллақачон Starlink тармоғи доирасида 1,9 мингга яқин сунъий йўлдошни учирди. Олимлар бир неча бор коинотдаги тўқнашувлар хавфидан хавотир билдириб, дунё мамлакатлари ҳукуматларини Ер атрофида айланиб юрувчи 30 000 га яқин сунъий йўлдошлар ва космик қолдиқлар ҳақида маълумот алмашишга чақирган.